Нам улууһун баһылыгын быыбарыгар барыллаан түмүккэ Юрий Слепцов эрэллээхтик кыайда. Киниэхэ быыбардааччы 86,89%-на (8478 киһи) куолаһын биэрдэ.
Кинини кытары күрэстэһээччилэр аҕыйах куолаһы ыллылар: Руслан Ипполитов – 757 (7,76%), Евгений Рябченко – 281 (2,88%). Бэлиэтээн эттэххэ, Нам улууһугар 15868 быыбардааччы баар.
Юрий Слепцов 1962 с. Сунтаар улууһун Элгээйитигэр төрөөбүт. СГУ-тын (2006), Уһук Илиннээҕи Судаарыстыбаннай сулууспа академиятын бүтэрбит. Намҥа Хатыҥ Арыы нэһилиэгин баһылыгынан үлэлээбит.
Ону тэҥэ Түбэ уонна Хатырык нэһилиэктэригэр баһылыктары таллылар. Түбэҕэ баһылыгынан үлэлии олорбут Константин Федоров хат талылынна. Хатырыкка Юрий Дьяконов кыайда.
Түбэ нэһилиэгэр 272 быыбардааччы баар. Константин Федоровка 137 (61,43%), Вячеслав Григорьевка 86 (38,57%) % киһи куоластаабыт.
Хатырыкка 672 быыбардааччыттан Юрий Дьяконовка 284 (53,89%) киһи, оскуола дириэктэрин солбуйааччы Александр Охлопковка 239 (45,35%) киһи куоластаабыт. Юрий Дьяконов 1989 с.т., спортивнай оскуолаҕа тренердиир эбит.
Ангелина Васильева, “Саха сирэ” хаһыат, edersaas.ru