Нам 1-кы Хомустаах модельнай бибилэтиэкэтэ нэһилиэк олохтоохторун угуйар
Нам улууһун 1-кы Хомустаах модельнай бибилэтиэкэтэ 1925 сыллаахха ааҕар балаҕан быһыытынан аһыллыбыта.
Былырыын “Култуура” национальнай бырайыак чэрчитинэн өрөмүөннэнэн, саҥардыллан, тэрилтэ модельнай бибилэтиэкэ статуһун ылбыта. «Эйгэ» бибилэтиэкэ бэйэтин аатыгар толору эппиэттиир.
Ол курдук, Намнааҕы кииннэммит юиблиотечнай тиһик салайааччыта Майя Софронова бэлиэтииринэн, киэҥ эйгэни хабар бибилэтиэкэҕэ «Үрдэл» коворкинг-киин үлэлиир. Кыраайы үөрэтэр “Айылгы” саалаҕа устуоруйа кэрэһиттэрин кэпсиир кинигэлэр, кырачааннарга сайыннарар оонньуур саала, обургу оҕолору уонна ыччаттары угуйар көмпүүтэр саалата, быһата, сайдыан, билиэн баҕалаах киһи тугу баҕарбытын булар, үөрэтэр, билэр, сынньанар.
Улуус баһылыга Юрий Слепцов модельнай бибилэтиэкэлэр оҕоҕо оскуоланы кытта тэҥҥэ билиини, сырдыгы иҥэрэллэрин бэлиэтиир.
Бибилэтиэкэ 11 106 кинигэ ааҕар пуондалаах. Бибилэтикэрдэр нэһилиэккэ ыытыллар бырайыактар ааптардарынан буолаллар. Култуура уонна духуобунас миниистирин солбуйааччы Владислав Левочкин бэлиэтииринэн бу нэһилиэк курдук модельнай бибилэтиэкэ быйыл өрөспүүбүлүкэ 11 нэһилиэгэр аһыллыаҕа.
Уопсайа “Култуура” национальнай бырайыак чэрчитинэн өрөспүүбүлүкэҕэ 22 бибилэтиэкэ модельнай статустаныаҕа. Бу күннэргэ кэккэ улууска бибилэтиэкэлэри саҥардыыга үлэ күөстүү оргуйар.
Елена ПОТОЦКАЯ, “Саха сирэ” хаһыат, edersaas.ru
Хаартыска — СӨ Ил Дарханын уонна бырабыыталыстыбатын саайтыттан.