Соторутааҕыта Уус Алдан улууһугар, Найахыга, улахан үөрүүлээх бэлиэ түгэн буолла. Бу туһунан нэһилиэк бибилэтиэкэтиттэн иһитиннэрдилэр.
Күөйэ түһэн эттэххэ, 2022 сылга улуус киинигэр, Бороҕоҥҥо, ыытыллыахтаах СӨ норуоттарын ХХХ спортивнай оонньууларыгар аныыр «Түмэр күн» диэн тэрээһин тэриллибит.
—Долгуйа кэтэһэр оонньууларбыт ыытыллаллара 1000 күн хаалбытынан итинник тэрээһин буолбута дьон-сэргэ сүргэтин көтөхтө, сэргэхсийиини таһаарда. Ыччаттар да улаханнык долгуйан, астынан сырыттылар. Эдэр көлүөнэни, нэһилиэк олохтоохторун чөл олоххо тардар, спортка угуйар, түмэр уонна сомоҕолуур сыаллаах спорт саҥа былаһааккатын аһыллыыта үөрүүлээх быһыыга-майгыга буолла, — диэтилэр.
Саҥа былаһааккаттан нэһилиэк олохтоохторо улаханнык үөрбүттэр, астыммыттар. «Ыччаттарбыт күн аайы манна кэлэн спордунан дьарыктаналларыгар, доруобуйаларын чэбдигирдинэллэригэр эрэлбит улахан. Хаһан эмэ, баҕар, биһиги оҕолорбут ортолоруттан өрөспүүбүлүкэҕэ, аан дойдуга биллэр-көстөр спортсменнар үүнэн-сайдан тахсыахтара», — дэспиттэр үөрэ-көтө.