Саха балаҕана омукпут олоҕун уйгутун түстээбит, удьуор утумун тэниппит, өбүгэ үгэстэрин олохтообут сылаас уйа буолан, үйэлэри уҥуордаан ытыктанан кэллэ.
Быйыл күһүн Уус Алдан улууһун Найахы нэһилиэгэр саха балаҕана аанын тэлэччи аһан, арыылаах алаадьынан ыалдьыттары айхаллыы көрсүбүтэ.
Бу туһунан өрөспүүбүлүкэтээҕи «Эйгэ» уопсастыбаннай тэрилтэ иһинэн үлэлиир нэһилиэктээҕи «Үһүс саас оскуолата» түмсүү салайааччыта Галина Чукрова маннык кэпсиир:
— Быйыл алтынньы ыйга нэһилиэкпитигэр саха балаҕана тутуллан үлэҕэ киирэн, олохтоохтор үөрүүбүт икки бүк үрдээтэ.
Балаҕан тутуллар сураҕын истээт, «Симэхтэр» түмсүү салайааччыта Харитина Гоголева, «Өбүгэ үйэлээх оһуора» кыбытыгынан тигии куруһуок салайааччыта Мария Федорова салалталарынан иистэнньэҥнэр түмсэн, ат симэҕин — чаппараах, кычым, дэпсэ тигиитин саҕалаабытара. Анаан былааннаан, балаҕан аһыллар күнүгэр нэһилиэк иистэнньэҥнэрэ наара ороннорго аналлаах 7 паннону, 12 олоппос олбохторун оҥорон бэлэх ууммуттара.
Өбүгэ үгэстэрин сайыннарыыга, көлүөнэттэн көлүөнэҕэ иҥэриигэ саха балаҕана улахан суолталааҕын таба өйдөөн, биир дойдулаахпыт СУ-77 ХЭТ генеральнай дириэктэрэ Петр Бурнашев 2 мөлүйүөн солкуобайы үбүлээн көмөлөспүтэ. Дьаһалта баһылыга Петр Сивцев олохтоох уолаттары уонна күтүөттэри кэпсэппитэ. Ол түмүгэр балаҕаны, уот ситимин — Алексей Рожин, көмүлүөк оһоҕун — Николай Лебедкин, Михаил Яковлев, олбуорун — Николай Фомин бэрт сатабыллаахтык балтараа ый иһинэн бэрт тупсаҕайдык оҥорон кэбиспиттэрэ. Ыра санаа буолбут балаҕаммыт тутуутугар үлэлээбит бары дьоммутугар, чуолаан баһылык Петр Сивцевкэ, меценат Петр Бурнашевка, биир дойдулаахтарбытыгар истиҥ махтал тылларын этэбит.
Балаҕаммыт кэрэни кэрэһэлии, үтүөнү үксэтэ, ыалдьыттары угуйа ыҥырар, көрсөр, киэн туттар, алгыс түһэрэр ытык сирбитинэн буолла. Бу күннэргэ саҥа балаҕаммытыгар Олоҥхо дэкээдэтин ыытар дьоллоннубут.
Елена ПОТОЦКАЯ, “Саха сирэ” хаһыат, edersaas.ru