Уус Алдан улууһун Найахы нэһилиэгэр 2012 сылтан баһылыгынан үлэлээбит Петр Сивцевы улуус дьаһалтатыгар атын дуоһунаска үлэлии барарын атаарыы, кинини чиэстээһин истиҥ киэһэтэ буолла.
Нэһилиэкпит ытыктыыр киһитэ баһылыгынан үлэлээбит сылларыгар ыыппыт сүрүн үлэлэриттэн холобурдаатахха, МПЧ-8 этэрээт тэриллэн, хас да ыал аҕалара үлэлээх буоллулар. Модульнай бибилэтиэкэ иһинэн А.М. Степанов аатынан кыраайы үөрэтии киинэ аһылынна. Улууска бастакынан Ыччат нэдиэлэтин ыытан, эдэр дьону түмэр, сомоҕолуур үлэни тиһигин быспакка ыытта. Саҥа култуура дьиэтэ дьэндэйдэ. Биисинэс-инкубатор арыллан үлэлээтэ. Аҕа дойду сэриитин бтэрээннэригэр анаан саҥа искибиэр саҥардылынна. Дүпсээ-Найахы суола тутулунна. Нам улууһун саалататын кытта дуогабардаһан, «Сайдыы» хочуолунай үлэҕэ киирэн, нэһилиэк олохтоохторо 100% ититиигэ холбонон олоробут. Граннарга кыттан, спортивнай уонна оҕо оонньуур былаһааккалара, Ийэ уонна оҕо искибиэрэ утулуннулар. «Тиит Буурай» спортивнай саала өрөмүөннэннэ. Саха балаҕана үлэҕэ киирэн, «Үһүс саас оскуола» уопсастыбаннай түмсүү иһинэн үлэлиир «Симэхтэр» иистэнньэҥнэр түмсүүлэрэ (сал. Х.И. Гоголева) манна хаһаайкаларынан буоллубут.
Баһылыкпытын атаарыы киэһэтигэр истиҥ иһирэх тыл, үтүө санаа этилиннэ. Манна үтүө киһиэхэ дьон махтала, таптала арылыччы көһүннэ. Петр Степановичка саҥа дуоһунаһыгар ситиһиилэри, доруобуйаны, тус олоҕор, дьиэ кэргэнигэр бары үчүгэйи баҕаран туран, биэс харахтаах харысхалы, сэлээппэ баайан бэлэхтээтибит.
Галина ЧУКРОВА,
педагогическай үлэ бэтэрээнэ,
СӨ Үөрэҕириитин туйгуна, СӨ Учууталлар учууталлара,
«Утум» түмсүү салайааччыта
Уус Алдан улууһа, Найахы нэһилиэгэ,