Наркология өрөспүүбүлүкэтээҕи диспансерын психиатр-нарколог бырааһа Надежда Хоютанова «арыгы коронавирус инфекциятын суох оҥорорго» көмөлөһөр диэн сыыһа өйдөбүлү быһаарда.
edersaas.ru
— Кырдьык, «арыгыны иһии коронавирус инфекциятыттан көмүскүүр» диэн санаа уруккуттан даҕаны социальнай ситимнэринэн уо.д.а. тарҕанар. Ол гынан баран, арыгы вирустаах ыарыылары утары охсуһууга сэрэтии сириэстибэтин быһыытынан хайа да кэмнэргэ билиниллибэтэҕэ.
Биллэрин курдук, арыгы ас буһарар уорганнар салыҥнаах бүрүөлэрин нөҥүө киһи организмыгар киирэн, организмҥҕа токсическай дьайыыны оҥорор. Онуоха ыарыыны утары охсуһар систиэмэ мөлтүүр, кутталлаах вирустарга антитела үөскүүрэ кыччыыр, ыарыы хаамыыта дириҥиир, бытааннык үтүөрдэр. Испиирдээх утаҕы иһэр эмтэнээччилэр үксүгэр пневмониялыыллара уонна ыксаллаах балаһыанньаҕа киирэллэрэ дакаастанан турар.
Ону таһынан инфекцияны эмтииргэ антиретровируснай уонна интерфероннаах препараттар туһаныллаллар, оттон этаноллаах субстраттары уонна арыгыны кытары тэҥҥэ иһэр буортулаах!
Кылаабынайа, ханнык да балаһыанньаҕа ханнык да арыгылаах утах ыарыыны сэрэтэр уонна эмтиир туһугар иһиллибэтин умнумаҥ. Эмчиттэргэ эрэ итэҕэйиҥ уонна кинилэр сүбэлэрин ылыныҥ», -– диэн бэйэбитин уонна чугас дьоммутун харыстыырга ыҥырар.
Надежда ЕГОРОВА, «Саха сирэ» хаһыат, edersaas.ru
Хаартыска Н.Хоютанова тиксэриитэ.