Comedy Woman шоу резиденэ, ырыаһыт Надежда Ангарская уу сахалыы “Саха үҥкүүтэ”, онтон “Якутяночка” ырыалары устуудьуйаҕа уһулан ыллаата. Видеотын “Инстаграмыгар” таһаарбыт.
Соторутааҕыта Саха сиригэр кэлэн кэнсиэртии сырыттаҕына, киниэхэ “СӨ култууратын туйгуна” ааты иҥэрбиттэрэ. Мантан долгуйан, Надежда “куруук биэс сыанаҕа үөрэниэм!” диэн эрэннэрбитэ.
https://www.instagram.com/p/Bh9ZcACBmUu/?taken-by=nadezhdaangarskaya
Надежда Ангарская Мииринэйгэ төрөөбүтэ. Биэс саастааҕар Нерюнгрига көһөн барбыттара. Оскуоланы бүтэрэн баран, Москваҕа актерскай факультекка туттарсыбыта эрээри, тыйаатыр – кини анала буолбатаҕын өйдөөбүтэ. Онтон 2004 с. СГУ математика институтун бүтэрбитэ. Бу сылларга кини КВН хамаандатыгар киирэн оонньообута. 2010 сыллаахха ТНТ ханаал Comedy Woman бырайыагар ыҥырыллан, билиҥҥэ диэи үлэлиир.
Аҕата слесарь-электрик, ийэтэ – инженер-электрик, эдьиийэ эмиэ инженер. Ол да иһин математик идэтин таллаҕа. Кыратыттан күүстээх куоластаах буолан, сыанаттан түспэт этэ.
Кини «Дежа Вю» КВН хамаандатыгар оонньуу сылдьан, иккитэ «Мисс КВН» аатын ылбыта. 2008 с. бу хамаанда КВН Үрдүкү лигатыгар киирбитэ. Ангарская киэҥник биллэр-көстөр буолан барбыта. «Камеди вумен» шоуга иккистээн ыҥырбыттарыгар, сөбүлэспитэ. Ол эрээри, ыарахан үлэҕэ түбэспитэ — биэрии уһуллар кэмигэр 18-тыы чаас үлэлииллэрэ. Кини саамай күүстээх куоластаах артыыска быһыытынан биллэр.
Сыллата улааппыт Нерюнгритыгар «КарТуш» бөлөҕү кытары аһымал кэнсиэркэ кыттар. Кини бэйэтин туспа суоллаах-иистээх ырыаһыт быһыытынан билиммэт, ол да буоллар, сольнай альбомун таһаарыан баҕарар.
35 киилэ ырбыт
Надежда Ангарская 2013 сыл сэтинньитигэр Иордания олохтооҕо Раед Банины кытары холбоспуттара.
Раед бастаан кыыс видеороликтарын көрөн баран, таптаан кэбиспит. Ол кэнниттэн интэриниэтинэн булан ылан, билсэн-көрсөн, ухаасыбайдаан саҕалаабыт. Бу саҕана кини биир да тылы нууччалыы билбэт этэ. 2015 сыллаахха уол оҕоломмуттара.
Ангарскаяны “Саха сирин Золушката” диэн ааттыыллар, олоҕун бэйэтэ оҥостубут дьахтар быһыытынан сыаналыыллар. Кэнники кэмҥэ кини тас көрүҥэ биллэ тубуста, уопсайа 35 киилэ ырбыт. Үрдүгэ 178 см, ыйааһына 80 киилэ буолбут. Маны кини спордунан дьарыктанан ситиспит.
Ангелина Васильева, “Саха сирэ” хаһыат, edersaas.ru