Маны аах Үөрэх уонна наука

Наахара оскуолатын кинигэтэ күн сирин көрдө

Мэҥэ Хаҥалас улууһун биир кырдьаҕас үөрэҕин кыһата Наахара оскуолата 2020 сылга 120 сааһын бэлиэтээбитэ.

Быйылгы үөрэх дьылыгар оскуолабытыгар Наахара бастакы учууталын, сырдатааччытын Платонов Иван Иванович аатын иҥэрбиттэрэ. Бу күннэргэ кэнчээри ыччаппытын үрдүккэ-кэрэҕэ сирдиир кыһабыт 120 сыллаах үбүлүөйүгэр аналлаах бэртээхэй кинигэ күн сирин көрдө!

Онон “Сахаада” кинигэ кыһатыгар (“ИП  Стручков В.Г.”) тахсыбыт кинигэни илиибитигэр ылан үөрүүбүт муҥура суох.  Кинигэ аата — «Үрдүккэ — кэрэҕэ сирдээбит оскуолам барахсан 120 сыла».  Хомуйан оҥордулар: Саввиннар учуутал династияларын чилиэнэ, Саха Өрөспүүбүлүкэтин үөрэҕириитин туйгуна, бэтэрээн учуутал Кычкина Екатерина Ивановна,  кыраайы үөрэтээччи, Арассыыйа  уопсай үөрэхтээһинин бочуоттаах үлэһитэ Кычкина Раиса Иннокентьевна. Кинигэ тахсарыгар үлэлэстилэр: Ларионова Нина Степановна, Васильева Венера Семёновна, Жиркова Светлана Анатольевна, Габышева Татьяна Степановна. 155 тираһынан тахсыбыт баай ис хоһоонноох кинигэҕэ оскуолаҕа араас сылларга үлэлээбит салайааччылар, учууталлар, выпускниктар ахтыылара, элбэх хартысканан матырыйааллар киирдилэр.

Оскуола билиҥҥи дириэктэрэ Михаил Васильевич Петров аан тылыгар бу курдук суруйар :» Киэн тутта ааттыыбыт саха норуотун историятыгар кэрэ-бэлиэ суолу хаалларбыт үтүөкэн дьоммутун: нэһилиэк бастакы үөрэхтээҕин,сырдатааччытын И.И.Платоновы, Саха АССР Киин Ситэриилээх Комитетын бэрэссэдээтэлин Н.В. Бубякины, Саха АССР социальнай харалтаҕа миниистирин Г.С. Фомины, Саха Өрөспүүбүлүкэтин норуодунай артыыстарын М.К.Попованы, М.П. Колесова — Расторгуеваны, С.И. Борисованы, Саха АССР култууратын үтүөлээх үлэһитин В.Р. Уломжинскайы, оскуолаҕа байыаннай — патриотическай иитиигэ сүдү кылааты киллэрбит, көһөрүллэ сылдьар Кыһыл знамя үйэ тухары хааларын ситиспит, нэһилиэккэ » Үлэ уонна бойобуой албан аат мусуойун» тэрийбит, саппаас майора, история учуутала В.Д. Никифоровы о.д.а.»

Салгыы кинигэҕэ 2 — с Наахара нэһилиэгин баһылыга Никитин Пётр Петрович оскуола нэһилиэк туллар тутааҕа буоларын, Наахараҕа бастакы оскуола аһыллыытын туһунан этиитэ киирбит. Баһылык бэлиэтииринэн, “араас ханаалларынан дохсуннук устар информация сайдыбыт кэмигэр, бүгүҥҥү учуутал аныгы үөрэнээччигэ, төрөппүккэ сүбэһит  буоларын тэҥэ психолог, социолог быһыытынан оруола улаатар”.

Кинигэни киһи биир тыынынан ааҕар. Ол оскуола историятыттан саҕалаан, кырдьаҕас выпускниктар, үлэлээн ааспыт учууталлар, кэнники көлүөнэлэр бииртэн биир истиҥ иэйиилээх ахтыылара, бэлиэтээһиннэрэ, анкеталара сылларынан наарданан бэркэ тиһиллэн киирбиттэр. Элбэх хаартыскаларга калейдоскоп курдук оскуолабыт ыыппыт үлэтэ — хамнаһа, ситиһиитэ оччотооҕу уонна билиҥҥи кэмнэри көрдөрөллөр. Дьэ ол иһин бу кинигэни оҥорууга сүрэхтэрин-быардарын биэрэн, сыламтата суох үлэлээбит дьоммутугар барҕа — махтал буолуохтун!

Үтүөнү, өйдөөҕү, үйэлээҕи ыһыыга , күннэтэ саҥаны көрдөөн, айымньылаахтык үлэлиир Наахарабыт оскуолатын кэлэктиибигэр өссө үрдүк кирбиилэри ыларыгар баҕарабын!

Елена Прокопьева, РФ уопсай үөрэхтээһинин Бочуоттаах үлэһитэ, РФ суруналыыстарын сойууһун чилиэнэ.

2
0