Өлүөхүмэ улууһун 1-Нөөрүктээйи нэһилиэгэр Бэтэрээннэр сэбиэттэрин бэрэссэдээтэлэ Анатолий Филиппов оҕолору патриотическай тыыҥҥа иитиигэ үгүс өрүттээх үлэни ыытар.
edersaas.ru
Ол курдук, Анатолий Николаевич оҕолорго араас бэсиэдэлэри ыытар, пионерга ылыыны, байыаннай-патриотическай күрэхтэһиилэри тиһигин быспакка тэрийэр.
Елена Мударисова салайааччылаах Ыччат түмсүүтэ, Наталья Будищева салайааччылаах Ийэлэр түмсүүлэрэ, бука бары ыкса сибээстээхтик үлэлииллэр. Нэһилиэк билигин биэс түөлбэлээх. Онон, үлэ күөстүү оргуйан эрэр. Холобур, Кыһыл аармыйа 100 сылын көрсө, түөлбэлэринэн күрэхтэһии бэрт тэрээһиннээхтик ааста.
Инникитин даҕаны, бары бииргэ түмсэн, сомоҕолоһон үлэлээтэхтэринэ, араас хайысхалаах тэрээһин элбиэҕэ, былааннаабыттара барыта олоххо киирэн иһиэҕэ.
Оттон бүгүн, нэһилиэккэ ыччаты патриотическай иитиигэ хайысха үчүгэйдик үлэлиирин, биир дойдулаахтарыгар үтүө холобур буоларын тоһоҕолоон бэлиэтиэхпитин баҕарабыт.
Валентина ВАСИЛЬЕВА, “Эйгэ” өрөспүүбүлүкэтээҕи уопсастыбаннай тэрилтэ салайааччыта.