Маны аах Сүрүн Тыа хаһаайыстыбата

Нөөрүктээйигэ Филипповтар хотуурдарын тыаһаппыттара ыраатта

Кураан Өлүөхүмэ сиригэр-уотугар эмиэ билиннэ.

edersaas.ru

Ханна даҕаны хартыына биир: урукку өттүгэр киһини курданарыгар тиийэ хоп-хойуу от өрө үүммүт сирэ билигин халтаҥнаабыт уонна аһыҥаҕа ылларбыт. Ити иһин, кураантан да, аһыҥаттан да өрүсүһэн итиэннэ үүммүт от иҥэмтиэлээх эттигинэн баай эрдэҕинэ диэннэр, ыаллар хотуурдарын тыаһаппыттара ыраатта.

Бастакы Нөөрүктээйи нэһилиэгин олохтоохторо ини-бии Филипповтар ынах сүөһүнү уонна сылгыны балачча элбэҕи ииттэллэр. Кинилэр аймахтыылар биригээдэлэрин тэринэн, нэһилиэктэригэр эрэ буолбакка, бүтүн улуус үрдүнэн оттооһуну саамай эрдэ саҕалыыр хаһаайыстыбанан биллэллэр.

Быйыл Сис Кумах арыытыгар баар ходуһаларыгар от ыйын 8 күнүттэн киирдилэр. Саас өрүс халааннаабакка, арыылары угуттаабакка ааспыта, инньэ гынан, үүнүү эриэн, сорох сиринэн үчүгэй, сорох сиринэн халтаҥ эбит. Онон айылҕа ууммут быйаҥын сыа-сым курдук тутан, барытын сирийэн оттуур санаалаахтар.

Өлүөхүмэттэн Валерий Малышев, «Саха сирэ» edersaas.ru сайтка анаан.

Хаартыскаҕа ааптар түһэриитигэр: Аймахтыылар биригээдэлэрин салайааччы Иван Филиппов шасси тыраахтарынан от оҕустарар, «Синтай» тыраахтарынан Владимир Филиппов үлэлиир.

0
0