Мэҥэ Хаҥалас Нөөрүктээйитигэр таах турбут дьиэни саҥардан, бизнес-инкубатор арыйдылар. Араас кэмҥэ бу дьиэ музей, АТС буолан турбут. Билигин дьоҕус бизнес сайдар киинэ буолуохтаах. Номнуо түөрт урбаанньыт киирэн үлэлээн эрэр. Уопсайа алта хостон иккитин Павловскайдааҕы орто оскуола бизнес-инкубаторыгар анаатылар.
Дьиэ уопсай иэнэ 182 кв.миэтэрэ. Өрүмүөннүүргэ 1 мөл. солк. кэриҥэ үп-харчы ороскуоттанна, мантан сороҕун улуус дьаһалатата уйунна.
Инкубатор үөрүүлээх арыллыытыгар Мэҥэ Хаҥалас баһылыгын бастакы солбуйааччы Владимир Птицын, баһылыгы солбуйааччы Леонид Спиридонов, улуус бизнес-инкубаторын дириэктэрэ Николай Скрябин уонна нэһилиэк баһылыга Николай Фёдоров, Павловскай олохтоохторо кытыннылар.
‒ Биһиги улууспут нэһилиэктэригэр дьоҕус бизнеһи сайыннарар үлэни утумнаахтык ыытабыт. — диир Скрябин. — Былырыын Бэдьимэҕэ маастардар уонна уустар дьиэлэрэ уонна Төҥүлүгэ ыччат уонна урбаан киинэ арыллыбыттара.
Бизнес-инкубаторга номнуо Ия Борисова ательета, Евдокия Неустроева парикмахерскайа, Лена Сергучева маҕаһыына, Иван Старостин иһэр ууну кутар киинэ үлэлээн эрэллэр.