Тохсунньу 31 күнүгэр Мэҥэ Хаҥалас улууһун Нөөрүктээйи нэһилиэгэр эдэр исписэлиистэргэ анаммыт түөрт кыбартыыралаах саҥа дьиэни арыйыы үөрүүлээх сиэрэ-туома буолла. Саҥа кыбартыыралар күлүүстэрин хаһаайыттарга улуус баһылыга Николай Старостин туттарда.
2016 сылтан «Мин Сахам сирэ ‒ XXI-с үйэҕэ» үтүө дьыала хамсааһын чэрчитинэн тутуллубут түөрт кыбартыыралаах дьиэҕэ Чурапчыттан төрүттээх Васильевтар дьиэ кэргэттэрэ тигистилэр. Семен Васильев кэргэнинээн учууталлар, дьиэ куортамнаһан олорбуттара икки сыл буолбут. Эдэр ыал Нөөрүктээйи сиригэр-уотугар кэлэн олохсуйан, оҕолонон, саҥа дьиэ хаһаайыттарынан буоллулар.
Бу күн Васильевтары сэргэ саҥа кыбартыыраларын күлүүһүн нэһилиэк участковайа, полиция үлэһитэ Александр Жирков, нэһилиэк землеустроителэ Александр Оконешников уонна Павловскай орто оскуолатыгар быйыл Кэбээйи улууһуттан информатика учууталынан үлэлии кэлбит Иванна Кобякова туттулар.
Бу тутуу биир уратытынан ХИФУ техническэй киинэ эспэримиэн быһыытынан оҥорбут автоклавнай пенобетонунан дьэндэтиллибитэ буолар. Олохтоохтор тутуу саҥа матырыйаала сылааһы тутар, үйэлээх буолуо диэн эрэнэллэр. Саҥа дьиэ толору хааччыллыылаах, хас кыбартыыра ахсын автономнай гаас оһохтоох. Онон коммунальнай өҥө иһин төлөбүр биллэ кыччыыра күүтүллэр.
Нэһилиэккэ үтүө дьыала хамсааһынын чэрчитинэн тутуллубут бу иккис эбийиэк. Бу иннинэ спорт саалата тутуллан туһаҕа киллэриллибитэ.
Нөөрүктээйи нэһилиэгин баһылыга Николай Федоров,социальнай эбийиэктэри, дьиэни-уоту тутуу араас бырагыраамаларыгар хото киирсэн, нэһилиэкпит саҥа тутууларынан киэркэйэригэр инникитин да үлэлэһиэхпит диэн эрэннэрдэ.
Зоя Герасимова, «Саха сирэ» хаһыат, edersaas.ru