Бу күннэргэ Нөмүгү оҕуруотчута Валерий Павлов тэпилииссэтигэр оҕурсута, помидора, биэрэһэ, дьэдьэнэ сайыҥҥылыы үүнэ турар.
edersaas.ru
Авиатор идэлээх киһи биэнсийэҕэ тахсан баран, куораттан көһөн, Нөмүгүгэ төрөппүттэрин дьиэтигэр олохсуйбута.
Кини онно сөбүлүүр дьарыгар таба тайанан, оҕуруотунан дьарыктанан барбыта.
Ол курдук, Валерий Викторович бэйэтэ уус буолан саҥа тэпилииссэ туттан, ититэр гаас ситимин холбоон, олунньуттан арассаадатын олордор.
Кулун тутартан бастакы оҕурсутун быһар уонна күн бүгүҥҥэ диэри үүннэрэр.
Быйыл 150 куул хортуоппуйу хомуйдулар. Оҕуруотун аһа да өлгөмнүк үүнэр.
Соторутааҕыта 11 киилэттэн тахсалаах хаппыыстаны быһан, бэйэтэ да соһуйда.
Оҕуруотчут оҕурсууга – «Кураж», помидорга тэпилииссэҕэ – «Благовест», таһырдьа – «Челнок» курдук саамай сөбүлүүр суортарын анаан олордор.
Биһиги, нөмүгүлэр, маннык бастыҥ оҕуруотчут киһибитинэн, Валерий Павловынан киэн туттабыт уонна холобур оҥостобут.
Августа ГАВРИЛЬЕВА,
Хаҥалас улууһун Нөмүгү нэһилиэгэ.
Хаартыскалар — Валерий Павлов дьиэтээҕи архыыбыттан.