Хаҥалас улууһун Нөмүгү нэһилиэгин баһылыга Наум Васильевич Устинов, түөлбэлэр начаалынньыктара
К.К.Острельдин, Ю.И. Сивцева,
И.А.Тобонов, И.Г. Михайлова, нэһилиэккэ үгүс өрүттээх үлэни ыыталлар. Манна дьон көҕүлээһинэ үтүө өйөбүлү ылар.
Ол курдук, ыам ыйын 21 күнүгэр, Ньукуолуну көрсө, Кузьма Острельдин салайааччылаах «Бэдэр» Аҕалар түмсүүлэрэ (20 чилиэннээх) Сайылык күнүгэр аҕам саастаах дьоннорун айылҕаҕа, күөххэ таһааран, олохтоох булчуттар кэһиилэринэн – куһунан, балыгынан күндүлээтилэр. Аһы-үөлү буһарыыга, бэлэмнээһиҥҥэ “Кэрэл” дьахталлар түмсүүлэрэ көхтөөхтүк кытынна, күүс-көмө буолла.
Маннык тэрээһин үгэскэ кубулуйан, сыл аайы ыытыллара кэрэхсэбиллээх. Даҕатан эттэххэ, нөмүҥүлэр кырдьаҕастарыгар уонна огдооболорго мэлдьи көмөлөһөллөр, холобур, кыһыҥҥы кэмҥэ босхо муус таһааран, сааһылаан биэрэллэр.
Аҕалар түмсүүлэрин салайааччы К.К.Острельдин.
— Оттон бу, Сайылык күнүгэр ыытыллыбыт түмсүүгэ алаадьы буһарыытыгар, кус үргээһиҥҥэ, балык хатырыктааһыҥҥа, чэй өрүүтүгэр олус интэриэһинэй күрэхтэһии ыытылынна. Дьон олус көхтөөхтүк кытынна.
Саха мааны астарынан күндүлэнэн, ытык кырдьаҕастар, аҕам саастаах дьон, сүргэлэрэ көтөҕүллэн, үөрэн-көтөн, оһуохайдаан, ыллаан-туойан, дуоһуйа сынньанан, тэрийээччилэригэр махтал истиҥ тылларын этэн, астынан тарҕастыбыт. Үрдүк таһымнаах, олус үчүгэй тэрээһин буолла!, — диэн санаатын үллэһиннэ Нөмүгү олохтооҕо, үлэ бэтэрээнэ Ольга Романовна РЕЕВА.