Нөмүгү хапсаҕайдьыттара сүрүн бириис — «УАЗ» массыына хаһаайыннарынан буоллулар

Бүгүн «Дохсун» спорткомплекска «Нэһилиэк» бырайыак чэрчитинэн Саха Өрөспүүбүлүкэтин муниципальнай тэриллиилэрин ортолоругар төрдүс төгүлүн ыытыллыбыт хапсаҕайга хамаанданан бастыыр иһин күрэхтэһии түмүктэннэ.

Икки күннээх күрэс түмүгэр Хаҥалас улууһун Нөмүгү нэһилиэгин (баһылык Наум Устинов) бөҕөстөрүн хамаандата бастакы миэстэни ылан, анал кубогы сэргэ Саха сириттэн РФ Федеральнай Мунньаҕын Федерация Сэбиэтин чилиэнэ Егор Борисов туруорбут бирииһинэн — «УАЗ» микроавтобуһунан биһирэннэ.

Үөһээ Бүлүү Кырыкый нэһилиэгэ (баһылык Сергей Сергеев) иккис буолла, итиэннэ «Марселле» миэбэл хампаанньата туруорбут 70 тыһыынчалаах сертификатын ылла.

Үһүс бириистээх миэстэҕэ тахсыбыт Нам улууһун II Хомустаах нэһилиэгин (баһылык Лев Новгородов) хамаандатыгар 50 тыһыынча солкуобай туттарылынна.

Роман ПОПОВ, «Саха сирэ» хаһыат

Ааптар хаартыскаҕа түһэриилэрэ.