Саха Өрөспүүбүлүкэтигэр дьоҕус предпринимательствоны өйүүр бизнес-инкубатордар үксүгэр улуус кииннэригэр тутуллаллар. Онтон бу соторутааҕыта Хаҥалас улууһун Нөмүгү сэлиэнньэтигэр СӨ предпринимательствоны өйөөһүн судаарыстыбаннай бырагырааматын чэрчитинэн тутуллубут бизнес-инкубатор үөрүүлээх быһыыга-майгыга аһылынна. Нөмүгү с. улуус киинин кытары ыаллаһа сытарын уонна суоллара олохтоохтук өрөмүөннэммитин учуоттаан, СӨ Предпринимательствоҕа министиэристибэтэ нөмүгүлэр көҕүлээһиннэрин өйөөтө.
Нэһилиэк баһылыга Василий Максимов эппитинэн, кинилэр бу бырайыактарын былырыыҥҥыттан туруорсан уонна көмүскээн быйыл үлэҕэ киллэрдилэр. Бизнес-инкубаторы «Хаҥалас улууһун производствотын сайдыытын киинэ» диэн ааттаатылар.
«Уон мөлүйүөн суумалаах объегы өрөспүүбүлүкэ, улуус уонна нэһилиэк бюджета уйунна. Өрөспүүбүлүкэ бизнес-инкубатордарыгар барыларыгар кэриэтэ өҥө араас көрүҥэ оҥоһуллар буоллаҕына, биһиги кииммитигэр чуолаан производство эрэ баар буолуоҕа. Ол курдук, тротуар билиитэтин, художественнай тимир оҥоһуктары, мас оҥоһуктары уонна корпуснай миэбэли оҥорор сыахтар үлэлиэхтэрэ. Онон, сүрүн сорукпутунан улууспут уонна нэһилиэкпит саҥа саҕалыыр предпринимателларын уонна производствонан дьарыктанар дьоннорун өйөөһүн буолар», – диэтэ нэһилиэк баһылыга Василий Максимов.
Производство сайдыытын киинэ бэйэтэ аана аһыллар алта боксалаах, пластик түннүктэрдээх. Предпринимателлар бастакы сылларыгар аренда сыанатын — 10, иккис сылларыгар – 20, үһүс сылларыгар – 30 бырыһыанын төлүөхтэрэ. Онтон үс сылынан манна атын предпринимателлар кэлэн үлэлиэхтэрэ.