Хаҥалас улууһугар “Нөмүгү агрофирмата” ХЭУо оҕо турбат ыалыгар майгынныыр олохтоно-дьаһахтана сылдьыбыта. Ол курдук, кыстыкка киириигэ алтынньы, сэтинньи ыйдарга хас да салайааччы уларыйбыта. Инньэ гынан хаһаайыстыбаҕа үлэ-хамнас эмиэ сатарыйа быһыытыйбыта.
Саната таарыйа эттэххэ, быйыл күһүн алтынньыга өрөспүүбүлүкэ бөдөҥ производственнай хаһаайыстыбалара — “Өлүөхүмэ кыладабыайа”, Хатастааҕы сибиинньэ комплекса, “Бөртө” сылгы собуота уонна “Нөмүгү агрофирмата” ХЭУо-лар “Анаабыр алмаастара” хампаанньаттан “Туймаада” АУо үп-харчы агропромышленнай хампаанньатын бас билиитигэр бэриллибиттэрэ. Тэрийээччи-бас билээччи хаһаайыстыбаҕа салайааччыны бэйэтэ аныыр бырааптаах. Ол быһыытынан, “Туймаада” ҮХАПХ АУо генеральнай дириэктэрэ Петр Ефремов сэтинньи 12 күнүгэр үлэ кэлэктиибин уопсай мунньаҕын тэрийэн ыытарыгар “Нөмүгү” агрофирмаҕа генеральнай дириэктэринэн Андрей Михайловы анаабыта.
Андрей Викторович Михайлов Хаҥалас улууһугар биллэр киһи, Покровскайдааҕы уотурба собуотун салайа сылдьыбыта. Саҥа салайааччы 135 мөл. солкуобай иэстээх тэрилтэни туппутун, мантан 87 мөлүйүөнэ урукку хаһаайын — “Анаабыр алмаастара” хампаанньа иэһэ буоларын, бэйэлэрин контрагенннарын кытта 48 мөлүйүөнү сыыйа төлөһүөхтэрин туһунан аһаҕастык этэр. Хаһаайыстыба быйылгы кыстыкка отунан, сенаһынан, сиилэһинэн толору хааччынан олорор. Итэҕэһэ диэн, хотоннор эргэрэннэр, тыал-тымныы курдат сылдьар буолбут. Өссө биир сүрүн кыһалҕа — тутаах исписэлиистэр тиийбэттэр. Зоотехниктара суох, экономист көстөн эрэр. Генеральнай дириэктэр экономиһын кытта саҥа сылга хаһаайыстыба хайысхаларын, тутулун сааһылыыр былааннаах. ХЭУо билигин 70-ча үлэһиттээҕиттэн сүөһүгэ быһаччы үлэлээччитэ – сүүрбэччэ.
“Билиҥҥи туругунан, дохуоппут ороскуоппутуттан икки төгүл кыра. Сөптөөхтүк дьаһанан, барыстаахтык үлэлииргэ сорук турар. Ол туһуттан ынахтан ортотунан 4 тыһ. киилэ үүтү ыырга уонна сирбитин-уоппутун табатык туһанан, үчүгэй үүнүү ыларга дьулуһуохпут. Үлэһиттэр өрүкүйүү кэнниттэн уоскуйдулар, санаалара көннө. Онон, таһаарыылаахтык үлэлииргэ эрэллээхпит”, — диир Андрей Викторович.
ХЭУо кылаабынай бухгалтера Анна Тимофеева биир хампаанньаттан атын хампаанньаҕа көһүүгэ улаханнык оҕустарбатахтарын уонна былырыыҥҥытааҕар балаһыанньа ордугун этэр. Былырыын курааннаан, хаһаайыстыба сүөһү аһылыгар күчүмэҕэйдэри көрсүбүтэ, үүт ыама түспүтэ. Онно тэҥнээтэххэ, быйыл аһылык да дэлэй, үүт да ыанар. Арай, эдэр ынахтарынан солбуйбут буоланнар, сыл түмүгүнэн 2,4 тыһ. киилэҕэ тахсыахтара. Кылаабынай бухгалтер этэринэн, хамнаска иэстэрэ суох. Саҥа ирдэбилинэн хамнаһы 27 тыһ. солкуобайтан таһааран олороллор. Маныаха Тыа хаһаайыстыбатын министиэристибэтин сүнньүнэн чэбдигирдии бырагырааматыгар киирэн 4-с сылларын үлэлииллэрэ улахан өйөбүллээх буолбутун махтанан бэлиэтиир. “Биһигини “Туймаада” АУо ылбытыттан үөрэбит эрэ. Исписэлиистэр тиһигин быспакка тахсан, сүбэлээн-амалаан абыраан эрэллэр. Эрэллээх хампаанньалыын бу курдук бииргэ тутуһан үлэлээтэхпитинэ, элбэҕи ситиһиэхпит дии саныыбын”, — диир хаһаайыстыба биир уопуттаах, сис үлэһитэ Анна Петровна.
Роман Соломонов агрофирмаҕа сайын хортуоппуйга, кыһын хотоҥҥо түүҥҥү харабылынан үлэлиир. Сыбаарсык идэлээх эдэр киһи харчылаах үлэни булуон сөп этэ эрээри, бэһис сылын сылдьарыттан сэдиптээтэххэ, сөбүлээбит бадахтаах. Кини курдук эдэр дьон манна элбэхтэр. Ол аата хаһаайыстыба инникилээх буоллаҕа.
Хаҥастан уҥа: О.П.Марков уонна А.В.Михайлов
Бу күннэргэ “Туймаада” хампаанньаттан АПК үлэһиттэрин идэлээх сойууһун сыахтааҕы кэмитиэтин бэрэссэдээтэлэ Олег Петрович Марков “Нөмүгү” агрофирма үлэһиттэрин сирэй көрсөн, үүнэн иһэр саҥа сылынан эҕэрдэлээтэ уонна оҕолоругар, сиэннэригэр анаан саҥа дьыллааҕы бэлэхтэри туттартаата. Онуоха харыларын күүһүнэн үрүҥ илгэни үрүлүтэ сылдьар тыа сирин үлэһит дьоно: “Эһиги көмөҕүтүгэр тирэнэн, саҥа сылга үлэҕэ үрдүк көрдөрүүлэри хайаан даҕаны ситиһиэхпит”, — диэн бигэ тылларын биэрдилэр.
Василий НИКИФОРОВ.