Н.Е.Андросов аатынан МУП олохтоох бородууксуйанан «Анаабыр алмаастарын» хааччыйар
Н.Е.Андросов аатынан МУП олохтоох бородууксуйанан кимнээҕи хааччыйарый?
Тас дойдулар сааҥсыйаларын кэмигэр Саха сиригэр хаһааҥҥытааҕар даҕаны бэйэ аһын-үөлүн дэлэтиигэ улахан суолта ууруллар буолла. Ол курдук, Анаабыр национальнай (долган-эбэҥки) улууһугар Н.Е.Андросов аатынан МУП нэһилиэнньэни олохтоох бэйэ бородууксуйатынан хааччыйыыга үлэлии-хамсыы олорор. Хаһаайыстыба астаан-үөллээн таһаарыынан дьарыктанар. Уопсайа 48 көрүҥ аһы оҥорон таһаарар. Ол курдук, балыктан, таба этиттэн ыыһаммыт, хатарыллыбыт бородууксуйаны оҥорон таһаарарын сэргэ тута буһарарга бэлэм астары (полуфабрикаттары) – пельмени, бузаны, тефтели эҥин бэлэмниир. Ону олохтоох нэһилиэнньэ хамаҕатык атыылаһар.
Бородууксуйаларын Сааскылааҕы тэҥэ Дьокуускайга тиэйэн илдьэн атыылыыллар, кыһын суол турдаҕына Өлөөҥҥө, Удачнайга, Сунтаарга кытта тиэйэллэр.
— Үлэбит өссө биир хайысхатынан бырамыысыланнас тэрилтэтин хааччыйыыга кыттыы буолар. Ол курдук, “Анаабыр алмаастара” хампаанньа сакааһынан 1,5 туонна пельмени оҥорон атыылаабыппыт. Бастаан амсайыыга, боруобалааһыҥҥа диэн сакаастаан баран, сөбүлээннэр, өссө сайаапкалаһар буоллулар. Саҥа дьыл кэнниттэн 15 туонна пельмени оҥорон, бу хампаанньаҕа биэриэхтээхпит. Онон пельмени оҥорор салаабытын кэҥэтиэхпит, кыалларынан үлэтэ суохтары ылан үлэлэтиэхпит, — диир генеральнай дириэктэр Александр Михайлов.
Тэрилтэ хайысхата киэҥ. Аҥардас аһынан-үөлүнэн эрэ муҥурдаммат. Олохтоох нэһилиэнньэҕэ туһалаах буоллун диэн Сааскылаахха “Фаворит”, Үрүҥ Хайаҕа “Фаворит-2” диэн ааттаах маҕаһыыннары аһан үлэлэтэр. Сааҥсыйалар эрэ иннилэринэ тохсунньуга, олунньуга бородууктаны эрдэ атыылаһан аҕалбыт буоланнар, олохтоохтор сөбүгэр сыананан атыылаһан абыраммыттар. Өссө бэкээринэлэрэ күҥҥэ 180 бухааҥканы астаан таһаарар. Бэкээринэҕэ бурдуктарын Нерюнгриттан чэпчэкитик ылан,хааччыммыттар. Гостиницалара 18 миэстэлээх. Онон Анаабырга Н.Е.Андросов аатынан МУП нэһилиэнньэ олоҕо-дьаһаҕа туруктаах, астаах-үөллээх, этэҥҥэ буолуутугар бэйэтин дьоһун көмөтүн оҥорор.
Бэлэмнээтэ Женни Стрюкова
Хаартысканы: МУП ыытта.