#МЫВМЕСТЕ норуоттар икки ардыларынааҕы бириэмийэ полуфиналыгар Саха сирин олохтоохторо киирдилэр. Бу бириэмийэ социальнай бырайыактары өйүүр, уопсастыбаҕа туһалаах көҕүлээһиннэр лиидэрдэрин таһаарар сыаллаах-соруктаах.
Бириэмийэҕэ 14 сааһын туолбут киһи, ким баҕарар кыттар кыахтаах: волонтердар, блогердар, биисинэс, медиа бэрэстэбиитэллэрэ, урбаанньыттар, пуондалар, уо.д.а.
Куонкуруска «Волонтеры», «НКО» уонна «Бизнес» диэн үс номинация баар. «Волонтеры» салааҕа Саха сириттэн «Маленькие ангелы» диэн бырайыактаах Артем Имбаев, «Глинотерапия – создаем вместе» диэн бырайыактаах Галина Коротова, «Путевка в жизнь» бырайыактаах Алексей Наумов полуфиналга таҕыстылар.
Оттон «НКО» салааҕа «Ресурсный центр «Харысхал+» диэн бырайыактаах “Харысхал” аһымал пуондата, «Угловские чтения, башаринские чтения, Маюровские чтения” бырайыактаах ХИФУ мэдиссиинэҕэ институтун анатомияҕа кафедратын иһинэн үлэлиир Чөл олох норуодунай университета, «Добровольцы малой родины» бырайыактаах Чурапчытааҕы физкултуура, спорт института, «Передвижной учебно-строительный комбинат» диэн бырайыактаах Идэҕэ урутаан бэлэмниир киин (ЦОПП), «Подготовка добровольческих отрядов по борьбе с лесными пожарами в отдаленных районах Республики Саха (Якутия)» диэн бырайыактаах СӨ баҕа өттүнэн үлэлээччилэр уопсастыбаннай ыстааптара киирдилэр. Көстөрүн курдук, уопсастыбаҕа элбэх туһаны аҕалар, көдьүүстээхтик үлэлии турар бырайыактар буолаллар.
Полуфинал түһүмэҕэ ДОБРО.РФ платформаҕа эспиэрдэр хамыыһыйаларыгар бырайыактары көмүскээһин кэтэхтэн ыытылла турар.Кыттааччылар анал сорудахтары толороллор. Финал алтынньы 15 күнүттэн сэтинньи 5 күнүгэр диэри ыытыллыа. Наҕараадалааһын Москваҕа ахсынньы 3-5 күннэригэр буолуоҕа.
Ангелина Васильева, “Саха сирэ” хаһыат”, edersaas.ru
Хаартыска: sakhagov.ru