MYTONA хампаанньа ойуур баһаардарын охсуһууга 12 улууска көмө оҥордо
Ааспыт сайын өрөспүүбүлүкэҕэ улахан ойуур баһаардара тураннар, тыҥааһыннаах балаһыанньа үөскүү сырытта. Ойуур баһаардарын утары охсуһууга өрөспүүбүлүкэ үгүс олохтоохторо, араас хампаанньалар күүс-көмө буолбуттара хайҕаллаах. Ол курдук от ыйыгар MYTONA хампаанньа 30 мөл. солк. ойуур баһаардарын утары охсуһууга ыытарын туһунан быһаарыныы ылыммыта.
MYTONA бастаан утаа оройуоннартан киирэр сайаапкаларынан үлэлээн, бэйэтэ араас техниканы атыылаһан нэһилиэнньэлээх пууннарынан ыыталаабыта. Онтон өрөспүүбүлүкэтээҕи добровольческай ыстаабы уонна олохтоох блогердары кытары бииргэ үлэлэһэн, спутниковай төлөпүөннэри, дроннары, GPS-навигатордары, баһаарга кэтиллэр анал таҥастары, респиратордары, бензопилалары, аһы-үөлү уонна да атын малы атыылаһан улуустарынан наардаан тарҕаталаабыттара. Маны таһынан өрөспүүбүлүкэтээҕи добровольческай ыспаапка 3 мөл. солк. харчыны тыырбыттара.
“Ойуур баһаардарын умулларыыга итиэннэ инникитин даҕаны туһалаах буоллун диэн, снегоболотоходтары уонна тыраахтардары атыылаһарга быһаарыммыппыт”, — диэн MYTONA бэрэстэбиитэллэрэ бэлиэтээн эттилэр.
Онон MYTONA хампаанньа Уус Алдан улууһун 3 мөл. солк. ГАЗ автоцистернанан,Үөһээ Бүлүү улууһун 1,5 мөл. солк. Сокол Про снегоболотоходунан, Таатта улууһун 950 тыһ. солк. снегоболотоходунан уонна да атын улуустары араас техниканан хааччыйда. Уопсай суумата 23,5 мөл. солк. тэҥнэстэ.
edersaas.ru