Горнай улууһугар, Мытаахха, култуура киинэ арылынна. Сиһилии улуустааҕы дьаһалта тэрийэр правовой отделын салайар Айталина Санникова кэпсээтэ.
—Мытаах нэһилиэгэр күүтүүлээх тутуу—култуура киинэ түмүктэнэн, аанын арыйар үөрүүлээх түгэнэ бэҕэһээ буолла. Үөрүүлээх, долгутуулаах түһүлгэҕэ мустубут бар дьон ортотугар алгысчыт Үрдүк Айыылартан көрдөһөн аал уоту аһатта, арыылаах алаадьынан, уохтаах кымыһынан айах тутан күндүлээтэ. Оттон аалай кыһыл лиэнтэни СӨ Бырабыыталыстыбатын бэрэссэдээтэлэ Владимир Солодов, СӨ Култуураҕа уонна духуобунай сайдыыга миниистир Юрий Куприянов, Горнай улууһун баһылыга Никита Андреев, Мытаах нэһилиэгин баһылыга Иван Петров, Дьиикимдэтээҕи култуура дьиэтин дириэктэрэ Анастасия Мордовская быстылар. Дохсун ытыс тыаһыгар доҕуһуоллатан, саҥа тутуу бэлиэтин — күлүүһү , култуура дьиэтин дириэктэригэр туттардылар.
Дьэ, бу кэнниттэн ытык Дьиикимдэ сирин-уотун бар дьонугар-сэргэтигэр кэрэни-сырдыгы саҕар үөрүүлээх дьоро күн үүммүтүнэн эҕэрдэ тыллар этилиннилэр, үлэһиттэр махтал суруктарынан наҕараадаланнылар.
Үөрүүлээх дьоро күҥҥэ «Үрүҥ хаар алгыһа» аан дойдутааҕы поэзия бэстибээлин кыттыылаахтара, СӨ наукаларын академиятын бэрэсидьиэнин эбээһинэһин толорооччу Василий Филиппов, модельер-худуоһунньук Августина Филиппова, уо.д.а. ыалдьыттаатылар.
Култуура киинэ Мытаахтан төрүттээх, ини-бии бырааттыыларга, саха норуодунай суруйааччыларыгар Семен, Софрон Даниловтарга аналлаах музейдаах, норуодунай худуоһунньук Афанасий Осипов хартыынатынан галереялаах, киэҥ-куоҥ саалалаах, сырдык фойелаах, элбэх анал хостордоох, истиин-тастыын аныгы үйэ ирдэбилигэр эппиэттиир матырыйаалынан бүрүөһүннээх, ураты кэрэ, кырасыабай оҥоһуулаах тутуу киһи болҕомтотун тута тардар. Үөрүүлээх дьоро киэһэ кэнсиэр бэртээхэй тардылынна. Саҥа, бэртээхэй тутууну нэһилиэк олохтоохторо көрөн-истэн улаханнык астыннылар, үлэ-хамнас өссө сайдарыгар тирэхтэнэн, үөрэн-көтөн тарҕастылар.
Саҥа кулууп «Култуура» национальнай бырайыак чэрчитинэн тутулунна. Сос Навоян салайааччылаах «Сахастрой-2002» ХЭУо тутта. Саҥа дьиэ 125 миэстэлээх, икки мэндиэмэннээх.
+1
+1
+1
+1
+1
+1
+1