Мырыла мобильнай биригээдэлэрэ 200 туонна отунан хааччыйарга бэлэмнэр
Чурапчы улууһун баһылыга А.Т. Ноговицын тыа хаһаайыстыбатын салалтатын эбээһинэһин солбуйааччы А.И. Сивцевы кытта Мырылаҕа бара сылдьан отчуттар звеноларын көрсөн оттооһун хаамыытын билистилэр.
edersaas.ru
Соловьев нэһилиэгин баһылыга Мария Кронникова тэҥҥэ сылдьыһан үлэни-хамнаһы көрдөрөн кэпсээтэ. Улууска тэриллибит суһал ыстаап дьаһалыгар олоҕуран, Мырылаҕа үс мобильнай биригээдэ тэриллэн, 200 туонна оту атыыга бэлэмниирин иһитиннэрдэ.
“Үрэхтэринэн үүнүү үчүгэй, бэйэ сирин оттоон бүтэммит, бу ыйтан саҕалаан мобильнай биригээдэ тэринэн биһиги 50 туонна оту эбии атыыга булуохпут,”— диэн улахан звено салайааччыта Афанасий Хоютанов үлэлииргэ бэлэмин, В.С. Петров звенота 100 тонна оту эбии атыыга оттуулларын иһитиннэрдилэр.
Мырыла удьуор туруу отчуттара харыларын ньыппарынан, Амма эбэ өҥ хочотугар оттооннор, сүөһүлэрэ быр бааччы кыстыыр отторун булуммуттарын көрөн, эбии кыһалҕалаах нэһилиэктэргэ көмөлөһөргө бэлэмнэрин истэн улуус баһылыга астыммытын биллэрдэ.
Чурапчы улууһун дьаһалтатын пресс киинэ