Дьокуускайга маннык ааттаах быыстапка чэппиэргэ буолаары турар. Бу туһунан Саха сирин норуоттарын муусукатын уонна фольклорун мусуойун наукаҕа үлэһитэ Мария Корнилова кэпсиир.
—“Мыргыму икэн” – “Дууһам ыллыыр” быыстапкаҕа норуот ырыаһыта Акулина Трайзе-Нулгынэч аудиодискэтин сүрэхтэниитэ буолуоҕа. Бу аудиодискэҕэ эбээннии, сахалыы тылларынан киллэриллибит 21 ырыаны ыалдьыттар истиэхтэрэ. Маны сэргэ, кини эһэтиттэн, Периҥэттэн истибит “Кутуйах уонна хопто”, “Кутуйах уонна сахсырҕа”, “Кутуйах уонна саһыл” остуоруйаларынан эбээннии, нууччалыы тылларынан оҥоһуллубут мульткиинэлэри көрүөхтэрэ.
Долгутуулаах тэрээһини А.П.Трайзе-Нулгынэч тэрийбит уонна салайар “Һярму һээдьэн” эбээн этно-фольклорнай кулууба, “Индигир”, “Долгунча”, “Хопто”, “Аймулдан” фольклор кэлэктииптэрэ, култуура уонна ускуустуба кэллиэһин устудьуоннара, мусуойбут эдэр волонтердара, “Парус” оҕо саадын “Күнчээн” бөлөҕүн иитиллээччилэрэ киэргэтэн, ситэрэн-хоторон биэриэхтэрэ. Сэргэх тэрээһиҥҥэ кэлиҥ, сылдьыҥ, дуоһуйа сынньаныҥ.
Биһиги корр., «Саха сирэ» хаһыат, edersaas.ru