«Царство вечной мерзлоты» туристическай комплекска керлинг диэн олимпийскай спорт көрүҥүнэн кыһыннары-сайыннары дьарыктанар кыах баар буолла. Ааспыт субуотаҕа үөрүүлээх арыйыы сиэрэ-туома ыытылынна.
Өрөспүүбүлүкэҕэ 2015 сыл бүтэһигэр Керлинг федерацията тэриллибитэ. Онон бу кыһыннары-сайыннары дьарыктанарга аналлаах, табыгастаах миэстэни тэрийэргэ быһаччы үлэлэстэ.
—Урут керлингистар «Эллэй Боотур» спорт дыбарыаһыгар дьарыктаналлара. Ол эрээри сарсыарда эрдэттэн киэһэ хойукка диэри дыбарыас иһэ оргуйан олорор: катокка хоккеистар, фигурнай хаҥкыһыттар дьарыктара, маассабай хаҥкылааһын барыта чааһынан үллэриллэн турар. Биһиэхэ күнүс 12 чаастан бириэмэ анаабыттара табыгаһа суох этэ. Үлэлии сылдьар дьон бириэмэ булан кэлэн дьарыктаналларыгар уустуктары көрсөллөрө. Билигин бириэмэтин бэйэбит аныыр кыахтанныбыт, — диэн этэр Керлинг федерациятын вице-президенэ Надежда Евсеева.
2016 сыл күһүнүгэр Арассыыйатааҕы керлинг федерацията сахаларга 1 мөлүйүөн солкуобайтан тахса суумалаах анал оонньуур таастары бэлэхтээбитэ. Бу кэмтэн ыла өрөспүүбүлүкэҕэ керлинг көрүҥүн интэриэһиргиир, дьарыктаныан баҕарар 70-ча киһи баар буолбута.
Былырыын СӨ Керлиҥҥа федерациятын ситиһиитин федеральнай таһымҥа бэлиэтээбиттэрэ. Олимпийскай спорт көрүҥүн тарҕатыыга, сайыннарыыга ситиһиилэрин иһин «Прорыв года» анал аатынан, Бочуотунай грамотанан наҕараадаламмыттара. Бу курдук икки эрэ регион бэлиэтэммиттэрэ: Красноярскай кыраай саамай элбэх күрэхтэһээччилээҕин (3000 киһи) уонна Саха сирэ көхтөөхтүк саҕалаабытын иһин.
Керлиҥҥа устудьуоннар туспа лигалаахтар, дойду улахан турнирдарыгар кыттар бырааптаахтар. Оччотугар талааннаах спортсменнар үрдүк таһымҥа идэтийэн дьарыктаналларыгар кыах баар.
«Царство вечной мерзлоты» комплекс мырааны хаһан оҥоһуллубут, урукку тоҥу харайар ыскылааттар миэстэлэригэр тутуллубута. Сүрдээх киэҥ-куоҥ, онон керлинг көрүҥэр биир туспа салааны анаатылар. Муус суолу скульптор-маастардар чочуйан, кылааннаан оҥордулар.
Ангелина Васильева, “Саха сирэ” хаһыат, edersaas.ru