Уус Алдан улууһун Мындааба олохтооҕо Мария Портнягинаны биир дойдулаахтара сахалыы таҥаска уонна дьахтар киэргэллэрин оҥорууга идэтийбит иистэнньэҥ быһыытынан билэллэр. Оннооҕор атын улуустартан кэлэн сахалыы моһуоннаах таҥаһы тиктэрэн бараллар.
Анивера Акимова, «Саха сирэ» хаһыат, https://edersaas.ru/
Атын иистэнньэҥнэртэн бэйэтэ туспа суоллаах-иистээх, ураты истииллээх Мария тикпит таҥастарын, киэргэллэрин уруккуттан сэргии көрөбүн. Мария Иннокентьевна идэтинэн буҕаалтыр.
– Бастаан таҥаспын улахан эдьиийим Зина тигэр этэ. Сыыйа бэйэм үөрэнэн, иискэ сыстан, тигэн барбытым. Cатаныа суоҕа диэн саллыбакка-толлубакка, иискэ үөрэммитим. Ыал буолан баран оҕолорум маскарааттарын, көстүүмнэрин бэйэм толкуйдаан, уратытык оҥорорго дьулуһарым. Сүрэхпин эпэрээссийэлэтэн инбэлииккэ тахсан, үлэбиттэн тохтуурга күһэллибитим. Ол кэмҥэ кыра уолбун Андрейы бэйэм дьарыктаан, «Инникигэ хардыы» өрөспүүбүлүкэтээҕи научнай-практическай кэмпириэнсийэҕэ «Муода уонна дизайн» секцияҕа, итиэннэ «Хотугу сулус» өрөспүүбүлүкэтээҕи күрэскэ кыттан, иккиэннэригэр үһүс истиэпэннээх лауреат буолбута. Научнай өттүн эдьиийим Зинаида Иннокентьевна сүрүннээбитэ. Куонкуруска кыттар оҥоһуктарын уолбунуун иккиэн толкуйдуурбут», – диэн Мария Иннокентьевна кэпсиир.
Урут «Бурда» сурунаалы дьахтар-аймах бары кэриэтэ суруттаран ааҕара. Сорохтор онно тахсар бэлэм ньэмиэтинэн дьууппа, былаачыйа тиктэн кэтэллэрэ. Мария эмиэ бу сурунаал көмөтүнэн үгүскэ үөрэммитэ.
Билигин бары күүһүн өбүгэ таҥаһын тарҕатыыга уурар. Бастакы сахалыы көстүүмүн бииргэ төрөөбүт эдьиийэ Людмила Иннокентьевна сиэнигэр Айыынаҕа «Мүрү чуораанчыктара» күрэскэ кыттарыгар анаан-минээн тикпит.
2014 – 2015 сылларга Мындаабаҕа «Үһүс көлүөнэ оскуолатыгар» оҕуруонан тиһии куруһуогун салайан, элбэх киһини үөрэппит. Сорохтор билигин даҕаны дьарыктаналлар эбит. Өссө оҥоһуктарын атыылаан биэнсийэлэригэр, хамнастарыгар эбии дохуот аахсаллар. «Киэргэллэрбин бэйэ-бэйэлэригэр майгыннаспат гына оҥоро сатыыбын. Уопсайынан, саҥа көрүҥнэри боруобалыырбын сөбүлүүбүн, – диэн Мария саҥаны, сонунун көрбүтүн барытын оҥорон көрөр үгэстээҕин этэр.
Мария Иннокентьевна үс оҕо, алта сиэн тапталлаах ийэтэ, эбээтэ. Кэргэнэ Алексей Николаевич идэтинэн суоппар. Кыра уола Мария суолун батыһан дизайнер идэтин баһылаан, бэрт таһаарыылаахтык үлэлии сылдьарын үөрэ кэпсиир.
Анивера Акимова, «Саха сирэ» хаһыат, edersaas.ru/