Алтынньы 19 күнүгэр Мүрү нэһилиэгин Мындааба бөһүөлэгэр «Кинилэр кыайыыны уһансыбыттара» Кыайыы скверигэр улуус бастакы механизатора, Саха АССР Үрдүкү Сэбиэтин дьокутаата Роман Николаевич Дьяконовка аналлаах пааматынньык үөрүүлээх быһыыга-майгыга арылынна.
Пааматынньык Мүрү нэһилиэгин дьаһалтатын баһылыга В.И.Аммосов, Мүрү нэһилиэгин дьокутааттарын сэбиэтин бэрэссэдээтэлэ О.Ф. Федоров, Дьяконовтар дьиэ кэргэн аймахтарын аатыттан Р.Н.Дьяконов уонна Мындааба орто оскуолатын 8 кылааһын үөрэнээччитэ Анита Карамзина кыттыылаах арылынна.
Нэһилиэк баһылыга Василий Аммосов: «Бүгүн биһиги нэһилиэкпитигэр долгутуулаах күн үүннэ. Роман Николаевич Дьяконов — Саха АССР Үрдүкү Сэбиэтин дьокутаата, улууспут бастакы механизатора, кыайыыны уһансыбыт тырахтарыыс кыргыттары иилээн-саҕалаан үлэлэппит киһи. Бу пааматынньык нэһилиэкпит биир улахан көстүүлээх пааматынньыктарыттан биирдэстэринэн буолар. Маны таһынан, Кыайыы 75 сылын көрсө «Кинилэр кыайыыны уһансыбыттара» сквербитигэр саҥардыы, тупсарыы үлэлэрин ыытыахпыт диэн сыал-сорук туруорунан сылдьабыт», — диэн эҕэрдэ тылыгар бэлиэтээн эттэ.
Пааматынньыгы биир дойдулаахтара, скульптор Владислав Бурцев уонна кини көмөлөһөөччүлэрэ Юлиан Павлов, Григорий Максимов оҥордулар. Пааматынньык полимер бетон диэн матырыйаалтан чочуллан тахсыбыт, таһа боруонсанан кырааскаламмыт. Уһуна 2,6 миэтэрэ, пааматынньык атаҕа — 1 миэтэрэ.
Надежда ЕГОРОВА, “Саха сирэ” хаһыат, edersaas.ru
