Өрөспүүбүлүкэ агрооскуолалара оҕолору кыра саастарыттан тыа сирин үлэтигэр-хамнаһыгар сыһыарар, алаас аныгы хаһаайыттарын иитэн таһаарар туһугар сыралаһан үлэлииллэр.
edersaas.ru
Кинилэр бары көмөлтө хаһаайыстыбалаахтар, сорохторо сүөһү-сылгы ииттэллэр, сорохторо сиртэн үүнээйини ылыыга идэтийэллэр. Ити эрээри, үгүс агрооскуола үптэрэ кырыымчык буолан, тыа хаһаайыстыбатын тиэхиньикэтинэн хааччынар кыахтара суох. Чурапчы улууһун Үлэ Дьоруойа Р.И.Константинов аатын сүгэр Мындаҕаайы агрооскуолатын дириэктэрэ Виктория Пермякова бу кыһалҕаны быһаарар суолу табыгастаахтык тобулла: «Туймаада-Лизинг» лизингэбэй хампаанньаны кытары дуогабар түһэрсэн, лизиҥҥэ «Бөлөрүүс» тыраахтары ылла.
Мындаҕаайы оскуолата 2004 сылтан аграрнай хайысханан үлэлиир. Амма өрүс кырыс сирин туһаҕа таһааран, үс гектарга бурдук ыһар, түөрт гектарга хаппыыста олордор, оскуола таһынааҕы учаастакка оҕуруот аһын үүннэрэр улахан тэпилииссэлэрдээх. Бэйэтин көрдөрүүтүнэн мэлдьи инники күөҥҥэ сылдьар. Холобур, ааспыт күһүн “Ас-үөл – 2017” өрөспүүбүлүкэлээҕи быыстапка-дьаарбаҥкаҕа 28 агрооскуола кыттыбытыттан бочуоттаах үһүс миэстэни ылбыта.
Раиса Сибирякова, “Саха сирэ”, edersaas.ru