Музыка оскуолатын көһө сылдьар быыстапката мусуойга турда

Бөлөххө киир:

Быйылгы сылбыт биир уһун кэмнээх дьоһун тэрээһиннэриттэн биирдэстэринэн тэрилтэлэрбит көһө сылдьар быыстапкалара уочаратынан мусуойга киириитэ буолар. Оскуолабыт быыстапкатын туһунан кэпсээбиппит.

edersaas.ru

Кулун тутар 15 күнүгэр Хатастааҕы музыкальнай оскуола 44 сыл устата тугу үлэлээн-хамсаан, кэҥээн-тэнийэн кэлбитин кэпсиир истиэндэлэр, хаартыскалар, үҥкүү көстүүмнэрэ, музыкальнай үнүстүрүмүөннэр, кыайыыны-хотууну туоһулуур кубоктар уо.д.а. тэлгэммит, ыйаммыт, ууруллубут быыстапкалара арылынна.
1978 сыллаахха үс үлэһиттээх, 50 оҕолоох оскуола күн бүгүн төһө-хачча буолбутун истэ-көрө, сэргэҕэлии кэлбит дьон устуоруйа страницаларын арыйан бэрт сэргэх сэһэни, кэпсээни иһиттибит-көрдүбүт. 44 сыл устуоруйа кээмэйинэн — оҕотук саас, онтон нэһилиэк олоҕор, күннээҕи олоххо кырата суох кэм. Бу сыллар тухары дойдуну кытта тэҥҥэ хаамсан, сайдан-үүнэн, силиһэ-мутуга дириҥээн, Аал луук маһа сириэдийэн, икки СӨ култууратын үтүөлээх, уонунан СӨ култууратын туйгуна үлэһиттээх, буспут-хаппыт, үлэлиир кыахтаах уонна баҕалаах кэлэктиип ситимнэһэ субуллар ситиһиилэрдээх даҕаны, үлүмнэһэ эккирэтэр ситиһиллиэхтээх сыаллаах-соруктаах даҕаны. Оскуоланы, анал үөрэҕи бүтэрэн баран кэлэн үөрэппит учууталларыныын тэҥҥэ үлэлэһэ сылдьар Анастасия Охлопкова, Екатерина Егорова, Айыына Сивцева-Постникова утум ситимэ быстыбатын туоһута буолаллар. Улуу Москуба куоракка Строганов аатынан академияны бүтэрбит Акулина Шелковникова СӨ Ойуулуур-дьүһүннүүр ускуустубатын түмэлигэр исписэлииһинэн үлэлии сылдьара эмиэ бу оскуола ситиһиитэ, киэн туттуута буолар.


«Тускул КК хореографтыы сылдьар Дайаана Иванова эмиэ бу оскуоланы бүтэрбитэ. Быйыл М.Жирков аатынан Дьокуускайдааҕы музыкальнай училищены бүтэрээри сылдьар Саша Белолюбскай бу оскуола норуодунай үнүстүрүмүөннэр отделениеларын бүтэрбитэ. Күн бүгүн оскуолаҕа урукку билиҥҥи үс, атын музыкальнай оскуолаларга дириэктэрдэрдээбит үс учуутал үлэлииллэрэ эмиэ биир туспа сонун. Оскуола тэриллиэҕиттэн 44 сыл биир хардыыны туора хаампакка, биир боруогу атыллыы сылдьар Зинаида Оконешникова кэпсиирэ-сэһэргиирэ элбэх.


Оскуола кэлэктиибин «Гармония» вокальнай ансаамбыла, норуот үнүстүрүмүөннэрин «Сандал» оркестра тэрээһини күүркэтэн, киэргэтэн биэрдилэр. Кэлбит дьону-сэргэни, тэрийээччилэри Хатас олохтоох дьаһалтатын салайааччы Пермяков Евгений Петрович эҕэрдэлээтэ. Устуоруйа страницаларын арыйан айаннатта — Саргылана Григорьева. Кэпсээни отделениелар салайааччылара салҕаатылар.
Алгыстаах алаадьынан айах тутан, сэргэхситэр сэһэннээх, кэрэхсэтэр кэпсээннээх үтүөкэн үлэһиттэрдээх Хатастааҕы оҕо ускуустубатын оскуолатыгар (дириэктэр Лемешева Христина Николаевнаҕа) барҕа махтал. Махтал түмэлбит дьиэтин куруутун ыраастык, чэбэрдик көрөн, киһи эрэ сылдьыан курдук тупсаҕай көрүҥнүүр Баишев Петр Анатольевичка.

«Саха сирэ» хаһыат, edersaas.ru анаан Наталья РУФОВА

+1
0
+1
0
+1
0
+1
0
+1
0
+1
0
+1
0