«Музей — киһи өйө-санаата, кута-сүрэ өрүкүйэр ытык сирэ» диэн быыстапка арылынна

Олунньу 16 күнүгэр Емельян Ярославскай аатынан музейга историк, кыраайы үөрэтээччи, историческай наука кандидата, Саха сирин музейдарын үлэтин чинчийээччи, сырдатааччы Пётр Васильевич Винокуров төрөөбүтэ 70 сылыгар аналлаах  «Музей — киһи өйө-санаата, кута-сүрэ өрүкүйэр ытык сирэ» диэн  быыстапка арыллыытын тэрээһинэ буолла.

Быыстапка турарыгар Пётр Васильевич олоҕун аргыһа, 46 сыл бииргэ олорбут кэргэнэ Любовь Афанасьевна Винокурова үгүс  үлэлэрин, ыстатыйаларын, хаартыскаларын, докумуоннарын биэрэн, көрбүт эрэ киһини сөхтөрөр дьоһун матырыйааллар көрдөрүлүннүлэр. Быыстапка ис тиэмэтин арыйарга үгүс сыраларын ууран, музей дизайн специалиһа Матрёна Семёновна Винокурова, фонда үлэһитэ Дарья Петровна Попова хорутуулаахтык үлэлээтилэр.

Быыстапка арыллар тэрээһинин  музей урукку директордара Надежда Семёновна Эртюкова, Егор Спиридонович Шишигин истиҥ-иһирэх тыллардаах ахтыылара олус киэргэттэ. Наука эйгэтигэр Пётр Васильевич дьоһуннаах научнай үлэлэрин ойуччу тутан, үйэлээҕи хаалларбытын бэлиэтээн Лена Борисовна Степанова, Людмила Николаевна Жукова, Пантелеймон Пантелеймонович Петров, Гаврил Иннокентьевич Адамов кинини чинчийээччи быһыытынан өрө тута саныылларын бэлиэтээн тыл эттилэр.

Үтүө киһи сырдык олоҕун, эрэллээх табаарыс, дьулуурдаах үлэһит буоларын кини бииргэ үөрэммит, үлэлээбит табаарыстара, доҕотторо, үлэһиттэрэ үгүс элбэх сырдык түгэннэри ахтан, истибит эрэ сылаас сүүрээҥҥэ куустарар эйгэни үөскэттилэр. Пётр Васильевич быраата Егор Васильевич Винокуров ахтыыта истиҥ эйгэни үөскэттэ. Ахтыы түгэнин иһирэх тылынан Пётр Васильевич 46 сыл олоҕун аргыһа оҥостубут, үс оҕотун күн күбэй ийэлэрэ, айар үлэтэ киэҥ эйгэҕэ тахсарыгар өйөбүл-тирэх буолбут күндү кэргэнэ Любовь Афанасьевна кэлбит дьоҥҥо махтал тылларын тиэрдибитэ өссө долгутуулаах буолла. Түмүккэ быыстапканы арыйыы аалай лиэнтэтин музей научнай үлэҕэ директоры солбуйааччы Айталина Николаевна Решетникова уонна Пётр Васильевич кэргэнэ Любовь Афанасьевна ытыс тыаһынан доҕуһуоллатан быстылар. Тэрээһин салҕыыта музей этногафическай киинигэр саха балаҕаныгар сандалы тула олорон, Пётр Васильевич олоҕун, айар үлэтин туһунан салҕыы ураты сэргэх кэпсэтии, алгыс курдук аламаҕай алтыһыы буолла.

Иһитиннэриини бэлэмнээтэ быыстапка тэрийээччитэ,

музей методиһа Диана Семеновна Осипова.