MuusuSTAR бэстибээл үөрэҕирии пуорумун 11 кыайыылааҕа федеральнай граҥҥа тигистилэр.

Бөлөххө киир:

MuusuSTAR бэстибээл үөрэҕирии пуорумун кыттыылаахтара иккис төгүлүн ыытыллар Бүтүн Арассыыйатааҕы ыччат бырайыактарын куонкуруһугар кытыннылар.

Мантан 11 кыайыылаах федеральнай граннарга тигистилэр. Грант уопсай сууммата  5,07 мөлүйүөн солкуобайга тэҥнэһэр. Куонкуруска уопсайа 70 сайаапка киирбитэ. Кыттааччылар пуорум былаһааккатыгар сылдьан бэстибээл хедлайнердарын маастар-кылаастарыгар сылдьар кыахтаммыттара.
СӨ Ил Дархана Айсен Николаев бэлиэтээбитинэн, MuusuSTAR бэстибээл хара маҥнайгыттан үөрэтэр соруктаах пуорум быһыытынан толкуйдаммыт. Манна кыттар ыччат элбэххэ, саҥаҕа үөрэнэн бэйэтин саҥалыы арыйар кыахтанар. Грант өйөбүлүн ылбыт бары бырайыактар социальнай хайысхалаахтар. Ол курдук «марафон ПРОконсолидация — Якутия» бырайыак улахан кылаас оҕолорун бырамыысыланнас салаатыгар идэҕэ туһаайар хайысхалаах. Маны таһынан «Оҕо киинэтэ» бырайыакка «Там, где танцуют стерхи» киинэҕэ сурдотылбаас оҥоруохтара. Ону сэргэ, «Через тернии к вершинам Олимпа!» бырайыак чэрчитинэн инбэлииттэр икки ардыларыгар РФ успуордун маастара Гаврил Текеянов кэриэһигэр волейболга өрөспүүбүлүкэтээҕи турнир ыытыллыаҕа.
Маны таһынан куонкуруска кыайыылаах бырайыактарынан “Этнокультурный туризм «Навстречу Северу”, “Подкаст о здоровье “телоБайки”, Арт эйгэ ”Якутия в лицах”, “У нас нет другой планеты”, национальнай төрүт успуорт көрүҥнэринэн дьарыктанарга аналлаах былаһаакка, «ЯРОстный турслет: Туристический слет студенческих отрядов Якутии» о.д.а.
Ыччат бырайыактарын куонкуруһун Ыччат дьыалаларын федеральнай ааҕыныстыбата номнуо иккис төгүлүн тэрийэн ыытар. 2021 cыллаахха ыытыллыбыт бастакы куонкуруска 49 бырайыактан 10 кыайыылаах тахсыбыта. Оччолорго грант уопсай сууммата 3,858 мөлүйүөн солкуобайга тэҥнэспитэ. Бырайыактар бары этэҥҥэ олоххо киирбиттэрэ. «Цифровая репрезентация культурного наследия долган» диэн Николай Захаров бырайыагар көрүллүбүт грант сууматын долган омук төрүт үгэстэрин видео-хаартыска нөҥүө үйэтитиигэ уонна нууччалыы-долганныы тылдьыт электроннай көрүҥүн оҥорууга анаабыта.
Миэдик-волонтердар бырайыактара 300 киһини түмпүтэ. Пуорум кыттааччылара социальнай бырайыактааһыҥҥа уонна былааннааһыҥҥа, волонтер үлэтин тэрийиигэ үөрэммиттэрэ.

«Марафон Profession НАВИГАТОР» диэн Покровскайдааҕы кэллиэс устудьуоннара мобильнай сыһыарыыны толкуйдаабыттара. Бу сыһыарыыны орто анал үөрэххэ туттарсыан баҕалаах оскуола оҕолоро туһаналлар.

Ульяна ЗАХАРОВА.

+1
0
+1
0
+1
0
+1
0
+1
0
+1
0
+1
0