Уус Алдан улууһугар Бороҕоҥҥо музыка оскуолатын преподавателэ Станислав Луковцев космонавтика, авиация тиэмэтигэр сыһыаннаах сөҕүмэр үчүгэй кэллиэксийэлээх.
Космонавтика күнүнэн мин кинини кытары төлөпүөнүнэн кэпсэттим.
—Тааттабын. Баайаҕаҕа үөрэммитим. Оччотооҕу уолаттар үксүбүт лүөччүк, космонавт буолуохпутун баҕарар этибит. Ол иһин, онно сыһыаннаах значоктары, кэмбиэрдэри 7-с кылаастан ыла муспутум. 1978 сыллаахха, «Бэлэм буол» хаһыакка «Коллекционер муннуга» диэн рубрикаҕа уопсастыбаннай кэрэспэдьиэн Петр Хатылаев мин туспунан суруйуута бэчээттэммитэ. Онтон саҕыллан, кэллиэксийэнэн өссө үлүһүйбүтүм, умсугуйбутум.
Үрдүкү кылааска үөрэнэ сырыттахпына, пионер баһаатайбыт Татьяна Игнатьевна Андросова пионердарга авиакуруһуок ыыттарбыта. Икки сыл устата ыыппыт куруһуокпар 6-7-с кылаастартан уонтан тахса оҕо сөбүлээн сылдьыбыта. Оччолорго бэйэбит «воздушный змей» оҥорон көтүтэр этибит. Онтон да атын дьарыкпыт син элбэх буолара. Билигин ол куруһуокпут туһунан Саха сиригэр биллэр-көстөр ааттаах-суоллаах улахан уустар Василий Яроев, Николай Колодезников наһаа үчүгэйдик ахталларыттан, саныылларыттан үөрэбин, — диэн кэпсиир Станислав Николаевич.
Станислав Луковцев 40-тан тахса сыл устатыгар муспут кэллиэксийэтигэр 1000-тан тахса маарка арааһа, биир оччо испиискэ хоруопкатын ойуута, үтүмэн кэмбиэр, хармаакка уктарга аналлаах кыра халандаардар, 4000-ҕа чугаһыыр значок, кинигэ арааһа, о.д.а. баар. Бу барыта авиацияҕа, комсонавтикаҕа сыһыаннаахтар. Кини бу дьарыгын хаҥата, байыта турар. Новосибирскай, Челябинскай, Москва курдук улахан куораттар кэллиэксийэньиэрдэрин кытары ыкса сибээһи тутар.
1994 сылтан улууска «Умсулҕан» диэн кэллиэксийэньиэрдэр түмсүүлэрин салайар. Нэһилиэктэригэр филиаллардаахтар. Былырыын түмсүүлэрин 25 сыл бэлиэтээбиттэр. Онно үлэлэрин сэһэргиир бэртээхэй кинигэ таһаартарбыттар. Түмсүүлэринэн нэһилиэк, улуус, өрөспүүбүлүкэ тэрээһиннэригэр куруук көхтөөхтүк кытталлар. Дүпсүҥҥэ Авиация уонна космос музейа 45 сыллаах (1974 с. тэриллибит) бэлиэ даататыгар анаммыт кинигэҕэ Станислав Николаевич туһунан киллэриллибит.
Өрөспүүбүлүкэҕэ, Арассыыйаҕа биллэр улахан кэллиэксийэньиэр «Азия оҕолоро» спортивнай оонньууга анаммыт өрөгөй ырыатын ааптара. «Ырыа ыллыгынан» (2014 с.), «Сырдык үөрүү» (2018 с.) ырыанньыктардаах, 60-тан тахса ырыалаах.
Сардаана Баснаева
Хаартыскалар: Станислав Луковцев тус архыыбыттан