Бүгүн, кулун тутар 11 күнүгэр, «Сахамедиа» медиа-киинигэр Саха сиригэр бастакытын ыытыллар «Muus uSTAR» ыччат бэстибээлин пресс-кэмпириэнсийэтэ ыытылынна. Манна СӨ Ыччат дьыалаларыгар уонна социальнай коммуникацияларга миниистирэ Степан Саргыдаев, «Синергия» корпорация вице-бэрэсидьиэнэ Ольга Грищенко, суруналыыстар, блогердар кыттыыны ыллылар.
Миниистир Степан Анатольевич: «Ил Дархан быһаарыытынан кулун тутар 26-27 күнүгэр, Арассыыйатааҕы да диэтэхпинэ сыыспатым буолуо, «Muus uSTAR» ыччат бэстибээлин ыытыахпыт. Тэрээһин сүрүн сыалынан Саха сиригэр ыччат үөрэх, идэ, урбаан, успуорт, айар үлэ өттүнэн сайдарыгар кыах баарын көрдөрүү буолар. Бэстибээлтэн үгүһү күүтэбит. Ол курдук, бу тэрээһин Саха сирин биир бастыҥ брендэ буолан, «Россия — страна возможностей» платформаҕа киирэрин, дойду ыччата манна кыттар баҕалаах буоларын ситиһии буолар.
Тэрээһиммит хас даҕаны хайысханан ыытыллыаҕа: киинэ, успуорт, муусука, үҥкүү, мультипликация, киберспорт, айти, суруналыыстыка. Былаһааккаларынан «Триумф», «Эллэй Боотур», «Айти-парк» уо.д.а. кииннэр буоллулар. Биллэрин курдук, сыстыганнаах дьаҥ мэһэйдииринэн, тэрээһиннэр онлайн киэбинэн эмиэ ыытыллыахтара.
Ыччат көхтөөхтүк регистрацияланан бэстибээлгэ кыттыан баҕарабын, muusustar.ru саайтка бүгүн регистрация саҕаланар.
Бэстибээл хэдлайнердарынан олимпийскай чөмпүйүөн Алина Загитова уонна биллэр артыыс Данила Козловскай буолаллар. Кинилэр маастар-кылаастары ыытыахтара.
«Росмолодежь» эспиэрдэрэ кэлэллэр, онон ыччат бырайыактарын кэпсээн, көрдөрөн-иһитиннэрэр граннары сүүйүөхтэрин сөп. Манна тэрилтэлэр эрэ буолбакка, биирдиилээн дьон эмиэ кыттыахтарын сөп», — диэн буолаары турар улахан тэрээһин туһунан сиһилии кэпсээтэ.
«Синергия» корпорация вице-бэрэсидьиэнэ Ольга Александровна Грищенко: «Бэстибээл хайысхаларынан араас куонкурустар ыытыллаллар, билигин сүүмэрдиир түһүмэҕэр ыччат кыттарын ситиһиэххэ наада. Финал кулун тутар 27 күнүгэр «Триумфка» ыытыллыаҕа. Сүрүн бырагыраама кэлэр нэдиэлэҕэ биллиэҕэ,» — диэн эбэн эттэ.
Хайысхаларынан ылан көрдөххө, хас биирдии хайысхаҕа олус интэриэһинэй бырагыраама күүтэр эбит. Ол курдук, холобура, «Кинематограф и искусство» диэҥҥэ Арассыыйа таһымнаах артыыс Данила Козловскай маастар-кылаастары ыытыаҕа, худуоһунньук Мира Аргунова перфоманс-быыстапката буолуоҕа. Оттон «Музыка Якутии» хайысхаҕа Леван Горозия кэнсиэрдиэҕэ, ырыаһыттарга, хомусчуттарга куонкурустар ыытыллыахтара уо.д.а.
Сахабыт сирин бары ыччатын сонун тэрээһиҥҥэ көхтөөх кыттыыны ыларга, улахан суумалаах граннары сүүйэргэ ыҥырабыт!
Айтана Аммосова, edersaas.ru