Muus uSTAR бэстибээлгэ хайдах кыттыахха сөбүй?

Бөлөххө киир:

Кулун тутар 27 күнүгэр Muus uSTAR диэн ыччат бастакы бэстибээлэ буолаары турар. Тэрээһиҥҥэ өрөспүүбүлүкэҕэ көхтөөх ыччаттар мустуохтара.

Бэстибээлгэ эдэр ыччат бэйэлэрин бырайыактарын, ситиһиилэрин киэҥ араҥаҕа таһааран көрдөрүөхтэрэ. Muus uSTAR – бу Саха Өрөспүүбүлүкэтин бырабыыталыстыбатын уонна «Синергия» корпорация бастакы кыттыгас бырайыактара.

Бэстибээл генеральнай партнера «ЭльгаУголь» ХЭУо. Тэрээһин Саха сирин талааннаах ыччатын айар дьоҕурдарын, спортивнай, биисинэс, цифровой эйгэҕэ саҥа саҕалааһыннарын өйүүр былаһааккатынан буолуоҕа.

Билигин өрөспүүбүлүкэҕэ COVID-19 ыарыынан ыалдьыы арыый да намтаан, бэстибээл икки форматынан ыытыллар кыахтанна. Сорох тэрээһиннэр онлайн, сорохторо миэстэтигэр ыытыллыахтара.

Бэстибээл тэрийээччилэрэ иһитиннэрбиттэринэн, сүрүн тэрээһиннэр «Триумф» спортивнай комплекска ыытыллыахтара. Манна араас күрэхтэр, маастар-кылаастар буолуохтара. Тэрээһиннэргэ кыттыан баҕалаахтар http://muusustar.ru саайтка киирэн суруттарыахтарын сөп. Миэстэ аҕыйах, онон кытаатыҥ.

Маны таһынан тэрийээччилэр күн ахсын 15 чаастан 20-лии билиэти оонньотоллор.

Бэстибээлгэ 14 саастарыттан 35-гэр диэри саастаах дьон кытталлар. Бэстибээл былаһааккаларыгар киирэргэ пааспары биитэр суоппар дастабырыанньатын ирдииллэр.

Оттон онлайн тэрээһиннэргэ төһө баҕарар киһи кыттар кыахтаах.

Сиһилии иһитиннэриини манна киирэн көрүҥ: http://muusustar.ru

edersaas.ru