«Muus uSTAR» бэстибээл чэрчитинэн бүгүн, кулун тутар 26 күнүгэр, «Топ-ведущий» диэн куонкурус түмүктэннэ. Куонкурус хамыыһыйатыгар уопсайа 20 сайаапка киирбит.
Бу кыттааччылар бары бэстибээл ыытааччыта буолаары бэйэлэрин холоннулар. Үрдүк баалы ылан кыайыылааҕынан Дьокуускай куорат дьаһалтатын уопсастыбаннай сибээс управлениетын исписэлииһэ Василий Зырянов уонна «Саха» НКИХ, «Якутия24» ханаалларга «Утро Якутии» биэриини ыытар Полина Долинская буоллулар.
Кыайыылаах Василий Зырянов санаатын үллэһиннэ:
— Кыайыылаах тахсыбыппыттан олус үөрдүм. Бу сибилигин бэлэмнэнэ баран эрэбит. 16:00 чаастан бэстибээл саҕаланыаҕа. Ыччат бэстибээлин ыытааччытынан мин, Мария Кравченко уонна Михаил Башкатов буолабыт. Элбэх Арассыыйа таһымнаах «сулустар» кэлбиттэр. Маннык биллиилээх, улахан сыана дьонун кытта тэҥҥэ биир сыанаҕа тахсан «Muus uSTAR» бэстибээли ыытарбыттан үөрэбин, астынабын уонна кыратык долгуйабын.
Ульяна ЗАХАРОВА.