Бүгүн, олунньу 28 күнүгэр, «Сахамедиа» медиа-киинигэр «Muus uSTAR» диэн ыччат бэстибээлин пресс-кэмпириэнсийэтэ буолла. Ыччат бэстибээлин тэрийээччи Ольга Грищенко иһитиннэрбитинэн, бу сылга 12 араас хайысха үлэлиэҕэ. Хас биирдии тиэмэҕэ спикеринэн биллэр-көстөр дьон кыттыахтара, лиэксийэ ааҕыахтара.
Холобур, «Кинематограф уонна искусство» хайыскаҕа Арассыыйа биллэр режиссера, сценарий суруйааччы, норуодунай артыыс Алексей Учитель кыттыаҕа, оттон “Мультик уонна анимация” хайысхаҕа “Союзмультфильм” киинэ устуудьуйатын дириэктэрэ Борис Машковцевы ыҥырбыттар. “Үҥкүү кыбартаалыгар” Арассыыйа үтүөлээх артыыһа Егор Дружинин, “Саха сирин муусукатыгар” ырыаһыт Клава Кока кыттыаҕа.
Маны сэргэ социальнай ситимнэргэ биллэр блогердар Фросик-Фрося, Татьяна Мингалимова, Елена Саморукова, Глеб Харитонов уонна Муз-ТВ ыытааччыта Дмитрий Красилов ыалдьыттыахтара.
Номнуо иккис сылын бу тэрээһиҥҥэ араадьыйа уонна тэлэбиидэнньэ ыытааччыта Антон Комолов уонна киинэ, тыйаатыр артыыһа Михаил Башкатов ыалдьыттыыллар.
Бэлиэтээн суруйдахха, иккис төгүлүн ыытыллар «Muus uSTAR» бэстибээл Дьокуускайга кулун тутар 25-26 күннэригэр ыытыллыаҕа.
Ульяна ЗАХАРОВА.
Хаартыска СИА саайтыттан туһанылынна.