Муус устар 8 күнүн түмүгэ

Ааптар: 
Бөлөххө киир:

Бэрдьигэстээх: хаарбах дьиэттэн — саҥа кыбартаалга

Бүгүн Горнай улууһугар Ил Дархан Айсен Николаев олорор дьиэ  квартальнай комплексын  уонна 550 миэстэлээх оскуола тутуутун кытта билистэ. Горнай Бэрдьигэстээҕэр бу үһүс квартальнай  тутуу комплекса  буолар.  Суолталаах тутуу туһунан улуустааҕы архтитектура уонна тутуу управлениетын салайааччыта Николай Дьяконов билиһиннэрэр:

— Бу тутуу сирэ сопхуос саҕана «МСО (молодежная строительная организация) кыбартаала» диэн этэ.  7 элбэх кыбартыыралаах үстүү мэндиэмэннээх дьиэлэргэ 116 ыал хаарбах дьиэлэртэн көһөн киириэхтэрэ. Быһа холуйан бу кыбартаалга 700 киһи олохсуйра былааннанар. Ол иһин бу кыбартаалга саҥа 550 миэстэээх оскуола тутулла турар.

Тутууну 2021 сылтан «Адгезия» ХЭУо саҕалаабыта. Бүгүҥҥү күҥҥэ тутуу 40% бүттэ. Тутар тэрилтэ дьиэни бу сыл сэтинньи саҥатыгар туттарыаҕа. Онон быйылгы сылга Горнай улууһун Бэрдьигэстээҕэр өссө биир саҥа кыбартаал эбиллэн, улуус киинэ тэнийбитин, улааппытын бэлиэтинэн буолуоҕа.

Сибиир уонна Уһук Илин эрэгийиэннэрэ төрөөбүт тыллары сайыннарыы үлэтин бөҕөргөтөллөр

Саха сиригэр Ил Дархан Айсен Николаев сорудаҕынан төрөөбүт тыллары сайыннарыы – билим-мэтиэдикэ өттүнэн арыаллааһын, төрөөбүт тыллары туһаныыны сыыппараҕа киллэрии уонна тарҕатыы  инники турар судаарыстыбаннай хайысхалар быһаарыллыбыттара.

Вице-премьер Сергей Местников бэлиэтииринэн, быйыл төрөөбүт тыллар үөрэххэ платформаларын тэрийии түмүктэнэр, “Улахан быһаарыылаах тылдьыт” электроннай барыйаанын оҥоруу бырайыага саҕаланар.

Эрэгийиэннэр икки ардыларынааҕы бииргэ үлэлэһии иитинэн Сибиир уонна Уһук Илин норуоттарын төрөөбүт тылларынан үөрэтиигэ үөрэх бырагыраамаларын биир кэлим интерактивнай баана тэриллиэҕэ. Эрэгийиэннэр национальнай гимназияларыгар (оскуолаларыгар) ситимнээх бырагырааманы олоххо киллэриэхтэрэ. Ону таһынан, эрэгийиэннэр икки ардыларынааҕы тыл лааҕырын тэрийэри былаанныыллар.

САССР төрүттэниитин туһунан быыстапка арылынна

“Арассыыйа – мин историям” историческай пааркаҕа муус устар 8 күнүгэр Национальнай архыып тэрийбит “Автономная Якутия: создание и становление (к 100-летию образования ЯАССР)” диэн историческай-документальнай быыстапка арылынна.

Манна  1920 сылтан саҕалаан, ааспыт үйэ 30-с сылларыгар диэри Саха сирэ автономияны ылбытын туһунан дьиҥнээх докумуоннар көрдөрүүгэ туруоруллубуттар. Холобур, Максим Аммосов Иосиф Сталиҥҥа автономияны туруорсан суруйбут суруга, Сталин “Я поддерживаю Аммосова” диэн суруктаах сорудаҕа, генерал Пепеляев суруга, Былатыан Ойуунускай, Максим Аммосов, Исидор Барахов, Степан Аржаков төрөөбүттэрин туоһулуур миэтирикэлэрэ, учуутал семинариятын хайдах үөрэнэн бүтэрбиттэрин туоһулуур аттестаттара, мунньахтар боротокуоллара, о.д.а. сыаналаах докумуоннар бааллар. Манна диэн эттэххэ, Сталин, Ойуунускай, Аммосов бэйэлэрэ суруйбут буочардарын, историческай суруктарын көрөр олус интэриэһинэй.

Бэрдьигэстээххэ быйыл оскуола тутуллан киириэҕэ

Быйыл Бэрдьигэстээххэ 550 миэстэлээх саҥа оскуола тутуллан киириэҕэ. Билигин үөрэнээччилэр 350 миэстэлээх эргэ мас дьиэҕэ үөрэнэллэр. Онон икки симиэнэҕэ үөрэнэргэ күһэллэллэр. Саҥа оскуолаҕа биир симиэнэнэн үөрэниэхтэрэ.

Бүгүн Ил Дархан Айсен Николаев Горнай улууһугар үлэлиир. Оскуола тутуутун билсэн, тутааччылары кытары кэпсэтэн  баран, кини:

—Оскуола тутуута кыраапыктан хаалбакка иһэр эбит. Бу Бэрдьигэстээҕи киэргэтэр тутуулартан биирдэстэрэ буолсу. Манна оҕолор бары өттүнэн сайдалларыгар, билии ылалларыгар үчүгэй усулуобуйа баар буолуо диэн эрэнэбин, — диэн эттэ.

Билигин оскуола дьиэтэ 47% тутуллубут. 2022 сыл төрдүс кыбаарталыгар тутуллан бүтүөхтээх. Билигин көҥдөйө бүппүт, тас истиэнэтин оҥоро сылдьаллар. Спортивнай саалаларга, аактабай саалаҕа тимиринэн таҥыы үлэтин саҕалаатылар. Аныгылыы тииптээх, киэҥ-куоҥ, сырдык, тупсаҕай көстүүлээх буолуохтаах.  Оскуола муниципальнай-чааһынай партнерство бырагырааматынан тутуллар.

С.П. Данилов аатынан Бэрдьигэстээхтээҕи орто оскуола дириэктэрэ Маргарита Константинова этэринэн, сэлиэнньэҕэ 662 үөрэнээччи баар. Онон оскуола икки симиэнэнэн толору үөрэнэр, эбии үөрэхтээһини уонна куруһуоктары, дьарыктары ыытарга кылаастар тиийбэттэр. Оттон бу саҥа таас оскуола бырайыагар икки улахан спортивнай саала уонна стадион киирэ сылдьар эбит. Онон бэрдьигэстээхтэр үөрэх кыһата тутуллан бүтэрин үөрэ, эрэнэ кэтэһэллэр.

edersaas.ru

+1
0
+1
0
+1
0
+1
0
+1
0
+1
0
+1
0