Муус устар 7 күнэ: киинэ тыйаатырдара, оҕо лааҕырдара, гуманитарнай көмө

Бөлөххө киир:

Саха сирин киинэ тыйаатырдара саха киинэтин прокакка таһааралларыгар субсидия ылыахтара, оттон спортсменнарга анаан анал күрэхтэһиилэр ыыттыллыахтара. Бу туһунан бүгүн салаа министиэристибэлэр салайааччылара Ил Дархан Айсен Николаевка буолбут мунньахха иһитиннэрдилэр.

«Тас дойдулар Арассыыйа ырыынагыттан барыахтарыттан, холобур, киинэ тыйаатырыгар үп-харчы киириитэ лаппа аҕыйаата.  Успуорт салаатыгар эмиэ уларыйыылар бааллар. Аан дойдутааҕы таһымнаах күрэхтэһиилэр аҕыйаатылар. Онон култуура, успуорт тэрилтэлэрин үлэтигэр уларытыылары киллэриэххэ наада. Дьон тэрээһиннэргэ хото сылдьарын курдук», –  диэн  Айсен Николаев  эттэ.

Саха Өрөспүүбүлүкэтин салалтата киинэ тыйаатырдарын субсидиялыыр туһунан былааннаах. Маны таһынан муус устарга билиэттэри онлайн атыылаһыыга саҥа платформа оҥоһуллан киирэрэ былааннанар.

                                               *          *          *

2025 сылга Булуҥ улууһун Тиксии  бөһүөлэгин  магистральнай трансарктическай уу аннынан барар  «Полярный экспресс» оптика утаҕар холбуохтара. Туһааннаах сөбүлэһиигэ Москва куоракка премьер-миниистир Андрей Тарасенко, «Морсвязьспутник» ФГУП  генеральнай директора Андрей Куропятников уонна«АрктикТелеком»  АУо  генеральнай директорын солбуйааччы Виктор Сергеев илии баттаатылар.

2020 сыллаахха бөһүөлэккэ   «АрктикТелеком»  сибээс оптическай ситимэ тутуллубута.  Онон Тиксии  магистральнай  сибээс линиятыгар холбонноҕуна олохтоохтор тута түргэн сырыылаах интэриниэтинэн туһанар кыахтаныахтара.

Инникитин өссө туһааннаах  магистральнай линияҕа Анаабыр улууһун Үрүҥ Хайатын, Булуҥ Найбатын, Усуйаана  Нижнеянскайын, Аллайыаха  Русскай  Устьетын уонна Аллараа Халыма Черскэйин холбооһун  боппуруоһа былааннанар.

                                                      *               *           *

Сайыҥҥы өттүгэр өрөспүүбүлүкэҕэ студенческай этэрээттэр 2200  байыастара үлэлиэхтэрэ. Бу  700 киһинэн ааспыт сыллааҕар улахан көрдөрүү.  Муус устар 4 күнүттэн студэтэрээттэр байыастара 21 хайысханан профессиональнай үөрэҕи бара сылдьаллар.

*           *          *

Быйыл 526 оҕо сайыҥҥы лааҕыра  оҕолору сынньатарга, иллэҥ кэмнэрин интэриэстэринэн туһалаахтык атаарарга бэлэмнэр. Маны таһынан, куорат таһыгар доруобуйаны бөҕөргөтөр 41, балаакканан сытар 15 лааҕырдар үлэлиэхтэрэ. Бу лааҕырдар бары санитарнай-эпидемиологическай ирдэбили тутуһан үлэлиэхтэрэ. Лааҕырдарга сынньаныыга уопсайа өрөспүүбүлүкэ оҕотун 70 бырыһыана хабыллыаҕа. «Сосновай Бор» Оҕо сынньанар киинигэр 640 оҕо сынньаныаҕа.
Бырабыыталыстыба вице-премьерэ Сергей Местников бэлиэтииринэн, 36 улуус дуогабардары түһэристэ.
*              *             *

Бу күннэргэ Москваттан Ростов-на-Дону куоракка Луганскай Норуодунай Өрөспүүбүлүкэ олохтоохторугар анаан гуманитарнай көмөнү хомуйан ыыттылар. Ол курдук Саха сирин волонтердара 7,5 туонна кэриҥэ аһы-үөлү, наадалаах табаардары хомуйбуттара. Туһааннаах аахсыйа Ил Дархан Айсен Николаев уонна СӨ бырабыыталыстыбатын өйөбүллэринэн оҥоһулунна.

edersaas.ru
+1
0
+1
0
+1
0
+1
0
+1
0
+1
0
+1
0