Ил Дархан Судаарыстыбаннай Дума аграрнай боппуруостарга кэмитиэтин бэрэссэдээтэлин кытта көрүстэ.
Бэҕэһээ муус устар 12 күнүгэр Ил Дархан Айсен Николаев Судаарыстыбаннай Дума аграрнай боппуруостарга кэмитиэтин бэрэссэдээтэлин Владимир Плотниковы кытта көрүстэ.
«Өрөспүүбүлүкэҕэ тыа хаһаайыстыбатыгар улахан болҕомто ууруллар. Эрэгийиэн бүддьүөтүттэн сыллата үгүөрү үп көрүллэр. Маны сэргэ, бааһынайдарга үгүс көмөнү оҥороҕут. Ол иһин Саха сиригэр тыа хаһаайыстыбатын бородууксуйата элбиир, оҕуруот аһын үүннэриигэ ситиһиигит элбэх», — диэн бэлиэтээтэ Владимир Плотников.
Быйыл 30 сылын туолар Бааһынайдар (фермердар) холбоһуктарын (Ассоциация) үлэтин уонна тыа хаһаайыстыбатын сайдыытын, дьүүллэстилэр, тыа сиригэр дьон-сэргэ олоҕо-дьаһаҕа хайдах тупсарын туһунан кэпсэттилэр.
Баһаартан, сааскы халаан уутуттан эмсэҕэлээбиттэргэ аналлаах көмө электроннай көрүҥүнэн оҥоһуллуоҕа.
Араас хабааннаах быһылаантан, алдьархайтан, холобур, баһаартан, халаан уутуттан тугу да суох хаалыахха сөп. Ыксаллаах быһыыга-майгыга түбэспит дьон бас билэр баайдарын-дуолларын толуйуу анал хамыыһыйа тиийэн, көрөн-истэн быһаарбытытын эрэ кэнниттэн ыытыллар. Билигин ити тустаах үлэ электроннай көрүҥүнэн ыытыллар буолбута махталлаах дьыала. Ол эбэтэр, быдан судургутуйда.
Бу туһунан СӨ бырабыыталыстыбатын бэрэссэдээтэлин 1-кы солбуйааччы Дмитрий Садовников муус устар 12-14 күннэригэр буола турар ыксаллаах быһыы-майгы кэмигэр үлэлиир ыстааптарга аналлаах бүтүн Арассыыйатааҕы үөрэҕи тэрийии кэмигэр этэн турар.
Тыа хаһаайыстыбатын министиэристибэтигэр аска-үөлгэ куттал суох буолуутун миэрэлэрин дьүүллэстилэр.
Бэҕэһээ Тыа хаһаайыстыбатын министиэристибэтигэр Бааһынай (фермерскэй) хаһаайыстыбалар уонна тыа хаһаайыстыбатын кэпэрэтииптэрин ассоциациятын чилиэннэрэ “Аска-үөлгэ куттал суох буолуутун хааччыйыы” тиэмэҕэ сэминээргэ муһуннулар, диэн тустаах министиэристибэ пресс-сулууспата иһитиннэрэр. Тэрээһин ассоциация тэриллибитэ 30 сылыгар ананна.
Тэрээһиҥҥэ Судаарыстыбаннай Дуума аграрнай боппуруостарга кэмитиэтин бэрэссэдээтэлин бастакы солбуйааччы, АККОР бэрэсидьиэнэ Владимир Плотников кытынна.
Хатаска социальнай гаастааһын саҕаланна.
Бүгүҥҥүттэн, муус устар 13 күнүттэн, Хатаска элбэх оҕолоох ыалларга бэриллибит учаастактарга гаас ситимин тардыы саҕаламмыт. Ол туһунан «Сахатранснефтегаз» АУо генеральнай дириэктэрэ Алексей Колодезников Дьокуускай куорат мээрэ Евгений Григорьевтыын Хатаска тиийэн кэпсэтиигэ эттэ.
«Кэккэ учаастактарга гаас ситимэ тиэрдиллэ илигиттэн дьон дьиэлэрин тутта сатаабаттар. Бу күннэртэн 14-с, 15-с, 16-с микрооройуоннарга тустаах үлэни тэрийиэхпит», — диэн Алексей Колодезников быһаарар. Мээр Евгений Григорьев бүгүҥҥү күҥҥэ 50 ыал гааһы холботторууга сайабылыанньа биэрбититтэн аҥаардара социальнай гаастааһыҥҥа хапсалларын туһунан иһитиннэрдэ.
Саха сиригэр 1234 богуон иһэр.
СӨ Бырабыыталыстыбатын бэрэссэдээтэлин солбуйааччы Михаил Никифоров муус устар 11 күнүнээҕи брифинигэр кулун тутар 10 күнүттэн Аллараа Бэстээхтээҕи тимир суол ыстаансыйатыгар бурдуктаах, саахардаах, куруппалаах, уотурбалаах 600-тэн тахса богуон сүөкэниллибитин туһунан иһиттиннэрбитэ. Онон бородууктанан, табаарынан хааччыллыы сөбүгэр бара турар.
2,5 тыһыынча киһи идэтин таһымын үрдэтиниэҕэ.
Саха сиригэр үлэтэ суох сылдьар дьоҥҥо сөптөөх болҕомто өрүү ууруллар. Ол курдук, үлэтэ суох сылдьар 2,5 тыһыынча киһини хаттаан үөрэтиэхтэрэ уонна идэлэрин таһымнарын үрдэтиэхтэрэ. Бу түмүгэр, экэниэмикэни оҥорор хампаанньалары олохтоох каадырынан хааччыйыыга сөптөөх үлэ ыытыллыаҕа диэн СӨ Бырабыыталыстыбатын бэрэссэдээтэлэ Андрей Тарасенко миниистирдэр, улуус баһылыктара кыттыылаах мунньахха иһитиннэрдэ.
edersaas.ru