Бэҕэһээ, муус устар 22 күнүгэр, В.И. Ленин төрөөбүтэ 150 сылыгар Бүтэйдээх мусуойун комплексыгар баар Өрөбөлүүссүйэ искибиэригэр Улуу сирдьит Өйдөбүнньүк бэлиэтин арыйдыбыт.
edersaas.ru
Тэрээһиҥҥэ олохтоох хомуньуустар, түмэл үлэһиттэрэ, киин куораттан улуус хомуньуустарын салайар Валерий Филиппов, «Сэндиэлэ» кыраайы үөрэтээччилэр кулууптарын чилиэннэрэ кыттыыны ыллылар.
Бүтэйдээхтээҕи кыраайы үөрэтэр мусуой дойду, өрөспүүбүлүкэ, улуус уонна нэһилиэк устуоруйаларыын көрдөрөр олус баай эспэнээттэрдээх. Хас биирдии бэлиэ даатаҕа, тэрээһиҥҥэ түмэлбит бэлиэ эспэнээтинэн хаҥыыр.
Улуу Ленин бюһун аһыы сиэрин-туомун кэнниттэн викторина кыайыылаахтара наҕараадаланнылар. Ол кэннэ бэйэлэрин эҕэрдэлэрин хомуньуус Анна Филиппова, пионербаһаатайынан үлэлээбит Елена Васильева, суруйааччы Елена Попова-Айыына, бу күн 50 сыллааҕыта пионерга киирбит Константин Родионов тиэртилэр. Аны түмэлбитигэр Улуу Кыайыы 75 сылынан искибиэргэ Иосиф Сталин бюһа кэлиэхтээх.
«Саха сирэ хаһыат, edersaas.ru анаан Константин РОДИОНОВ,
Мэҥэ Хаҥалас улууһа, Бүтэйдээх.