Бу күннэргэ култуура эйгэтин бөдөҥ салайааччылара үлэлэриттэн уурайдылар.
Үлэ дуогабарын болдьоҕо бүппүтүнэн, Национальнай художественнай мусуой генеральнай дириэктэрэ Ася Габышева дуоһунаһыттан босхолонно. Кини – Арассыыйа Худуоһунньуктарын сойууһун чилиэнэ, Саха сирин худуоһунньуктарын сойууһун бырабылыанньатын чилиэнэ, Норуоттар икки ардыларынааҕы мусуойдар сэбиэттэрин чилиэнэ.
Суорун Омоллоон аатынан Опера уонна балет тыйаатырын дириэктэрэ Сергей Сюльскай үлэ дуогабарын болдьоҕо бүппүтүнэн, дуоһунаһыттан босхолонно. Кини тыйаатыры 2013 сылтан салайбыта.
Емельян Ярославскай аатынан Дьокуускайдааҕы Хотугу норуоттар култуураларын, историяларын мусуойун дириэктэрэ Егор Шишигини Ил Дархан муус устар 29 күнүнээҕи укааһынан дуоһунаһыттан босхолоото. Кини эмиэ үлэ дуогабарын болдьоҕо бүппүт.
Егор Шишигин мусуойу 1976-1992 сылларга уонна 2003-2019 сылларга салайбыта.
Ангелина ВАСИЛЬЕВА, “Саха сирэ” хаһыат, edersaas.ru