Бүгүн Дьокуускай куорат мусуойдара флешмоб экскурсиялар бүтүн Арассыыйатааҕы аахсыйаларыгар кытыннылар. edersaas.ru
Бу аахсыйаны аан бастаан 2017 сыллаахха Омскай уобалас мусуойдара атырдьах ыйын 29 күнүгэр күнүс 12 чаастан көҕүлээн ыыппыттара. Онтон дойду түмэллэрэ бу бэртээхэй саҕалааһыны сөбүлээн, бу күҥҥэ бу чааска сыл аайы ыытан барбыттара. Быйыл төһө да сыстыганнаах дьаҥ бүрүүкээн турдар, дойду куораттара, ол иһигэр Дьокуускай, бэйэлэрин мусуойдарыгар бары санитарнай ирдэбили тутуһан ыыттылар.
Мусуойдарга ыытыллыбыт тэрээһин туһунан Дьокуускай куораттааҕы Үһүс көлүөнэни кытта ыкса сибээстээхтик үлэлиир саастаах дьону түмэр «Эрчим» социальнай тэрилтэ уопсастыбанньык-актыбыыһа Валентина Прокопьева санаатын бу курдук үллэһиннэ:
— Биһиги бэҕэһээ бөлөхпүтүгэр батсаабынан кэлбит биллэриини ааҕан баран, үһүө буолан дьүөгэлэрэбин кытта бу тэрээһиҥҥэ кыттыыны ыллыбыт. Өрөспүүбүлүкэтээҕи Е. М. Ярославскай аатынан кыраайы үөрэтэр мусуой иһинэн үлэлиир «Саха балаҕаныгар», Былатыан Ойуунскай аатынан Саха академическай тыйаатырыгар,
«Киэргэ» ювелирнай дьиэ мусуойдарыгар экскурсияҕа сырыттыбыт, түмэллэр устуоруйаларын кытта билистибит.
«Саха сиригэр сыылка устуоруйата» диэн тиэмэлээх М.К. Аммосов аатынан мемориальнай мусуой-дьиэҕэ сырыттыбыт. Тэрээһиннэр бары санитарнай ирдэбили тутуһан ыытылыннылар.
Елена ПОТОЦКАЯ, «Саха сирэ» хаһыат, edersaas.ru
Хаартыска, видео — Валентина Прокопьева тиксэриитэ.