Бу күннэргэ «Саха АССР 100 сылыгар 100 уопсастыбаннай көҕүлээһин» куоластааһын куонкуруһа түмүктэннэ.
Ыам ыйын 12 күнүгэр анал хамыыһыйа 2021 сыллаах күрэс түмүгүн таһаарда. Сайаапкалары кулун тутар 15 күнүттэн муус устар 17 күнүгэр диэри ылбыттара. Куонкурус куйаар ситиминэн куоластааһын быһыытынан барбыта. Уопсайа 14 муниципальнай тэриллииттэн 30 бырайыак дьүүлгэ турбута. 11752 куолаһы ылан «Нэһилиэктээҕи уопсастыбаннай көҕүлээһин» номинацияҕа кыайыылааҕынан Хаҥалас улууһун «1-кы Дьөппөн нэһилиэгэ» МТ таҕыста. Бу туһунан уопсастыбаннай кэрэспэдьиэммит, Хоточчу нэһилиэгин бибилэтиэкэрэ Лира Яндреева кэпсээтэ: «Нэһилиэк мусуойун туттарыы туһунан боппуруоһу олохтоохтор 2018 сыллаахха туруорсубуттара. Олохтоох дьаһалта нэһилиэк киинигэр сир тыырбыта. Ол кэнниттэн эр дьон субуотунньугунан тутуу маһын кэрдэн киллэрбиттэрэ. 2018-2020 сылларга олохтоохтор 425 тыһ. солкуобайы хомуйбуттара. Мусуойу тутууга нэһилиэктэн төрүттээх патриот дьон эмиэ спонсордаан көмөлөстүлэр«.
Ити курдук, «норуот күүһэ — көмүөл күүһэ» диэн бэргэн этиинэн сирдэтэн, олохтоохтор биир сомоҕо буолан, нэһилиэк түмэлин тутууга кылааттарын киллэрэллэр. Сомоҕолоһуулаах дьонноох нэһилиэк өрүү инники күөҥҥэ сылдьарын холобура — Хаҥалас бастакы дьөппөннөрө.
Елена ПОТОЦКАЯ Саха сирэ хаһыат, edersaas.ru