Биллиилээх мусукаан, норуот муусукатын, фольклорун хомуйааччы, Эдуард Ефимович Алексеев күн сириттэн барда.
Кини 1937 сыллаахха Дьокуускайга төрөөбүтэ. 1952–56 сылларга Москваҕа Киин муусука оскуолатын (ЦМШ) кыһыл көмүс мэтээлинэн бүтэрбитэ. Чайковскай аатынан Москватааҕы консерваторияны туйгуннук үөрэнэн бүтэрэн баран, дойдутугар кэлэн муусука сайдыытыгар элбэх сыратын уурбута. Ол курдук, 1962 сыллаахха Киристэпиэл Махсыымап ырыаларын хомуурунньугун таһаарбыта, Үстүүн Нохсоороп тойуктарын нуотаҕа киллэрэн, грампластинкаҕа таһаартарбыта. Композитор Г.Н.Комраковы кытта “Манчаары” операны туруорбута. Надежда Николаева, Галина Алексеева, Зоя Винокурова курдук муусука улахан үлэһиттэрин үөрэтэн таһаарбыта.
Кини фольклору үөрэтэр эспэдииссийэлэри тэрийбитэ. Саха сиригэр эрэ буолбакка, Алтай, Абхазия, Аджария, Адыгея, Башкирия, Белоруссия, Бурятия, Грузия, Монголия, Тыва, Калмыкия, Киргизия, Крым, Узбекистан, Краснодар норуоттарын ырыаларын чинчийэр эспэдииссийэлэргэ сылдьыбыта. 1970-80 сылларга ыччат муусукаҕа үлүһүйүүлэрин чинчийэн үөрэппитэ. Эдуард Ефимович этнографияҕа уонна фольклорга сыһыаннаах 100-тэн тахса научнай үлэ ааптара. Сэбиэскэй Сойуус композитордарын сойууһун иһинэн фольклор хамыыһыйатын төрүттээччи.
Учуонай, мусукаан чугас аймахтарыгар дириҥ кутурҕаммытын тириэрдэбит.
Хаартыска Академия Духовности РС(Я)