Лоп курдук биэс сыл анараа өттүгэр – 2013 сыл алтынньы 1 күнүгэр, Муусука аан дойдутааҕы күнүн бэлиэтиир кэммитигэр, СӨ бастакы бэрэсидьиэнэ Михаил Николаев көҕүлээһининэн, “Муусука — барыбытыгар” бырайыак саҕаламмыта.
Бырайыак сүрүн соруктарыттан биирдэстэринэн, оҕо талаанын арыйыы, сайыннарыы буолар.
Ааспыт сыл ахсынньы 4-11 күннэригэр Москваҕа “Култуура” телеканаал тэрийиитинэн, эдэр мусукааннар “Щелкунчик” норуоттар икки ардыларынааҕы телевизионнай куонкурустара ыытыллыбыта. Бу улахан куонкуруска Саха сириттэн 7 саастаах Аида Филиппова кыттыбыта. Аан дойду 23 дойдутуттан, Арассыыйа 37 куораттарыттан, бөһүөлэктэриттэн кыттыылаах куонкурус сүүмэрдиир түһүмэҕин ситиһиилээхтик ааһан, Аида куонкуруска ыҥырыы туппута уонна саамай аччыгый саастаах мусукаан буолбута.
Аида Филиппованы 2014 сылтан РАЕ профессора, “Билиигинэн — кыайыаҥ” М.Е.Николаев бириэмийэтин лауреата, М.Н.Жирков аатынан Дьокуускайдааҕы Мусукаалынай кэллиэс преподавателэ Оксана Юрьевна Честных дьарыктыыр. Учууталлара этэллэринэн, Аида муусукаҕа айылҕаттан айдарыылаах. Олус үлэһит, дьүккүөрдээх. Профессиональнай сценаҕа 4 сааһыттан тахсыбыта.
Оттон “Щелкунчик” куонкурус дьүүллүүр сүбэтин чилиэннэринэн аан дойду үрдүнэн биллиилээх мусукааннар буолбуттара.
Дмитрий Башкиров, Арассыыйа норуодунай артыыһа, П.И.Чайковскай аатынан Москватааҕы консерватория профессора:
—Аида олус мусукаалынай. Кэскиллээх. 7 сааска маннык ситиһиилэнии диэн киһиэхэ барытыгар бэриллибэт…
Николай Демиденко, пианист, Монреаллааҕы уонна Москваҕа П.И.Чайковскай аатынан норуоттар икки ардыларынааҕы куонкурустар лауреаттара:
—Олус талааннаах, кини муусукаҕа ананан төрөөбүт — ол хас биирдии нотатыгар көстөр!
Дьүүллүүр сүбэ сүрэҕин тутан, бу куонкурус историятыгар аан бастаан, муусукаҕа бэриниилээҕин, ис-сүрэҕиттэн иэйиилээх толоруутун, артистизмын, талаанын иһин Аида Филиппова “Мини-Щелкунчик” анал бирииһинэн наҕараадаламмыта. Оттон куонкурус өрдөөҕүттэн партнера “Yamaha Music” Генеральнай дириэктэрэ Есинора Сасаки Аидаҕа Yamaha NU-1X Avant Grand цифровой гибриднэй фортепианоны бэлэхтээбитэ.
Бүгүн — алтынньы 1 күнэ — Муусука аан дойдутааҕы күнэ!
Саха сирин эдэркээн, талааннаах мусукаана Аида Филиппова Муусука нэдиэлэтигэр кыттар.
Татьяна Маркова, edersaas.ru