Саҥа үөрэх дьылын көрсө Өлүөхүмэ улууһун Кыыллаах нэһилиэгин уһуйаанын тас эркинин харысхал муралынан киэргэттилэр.
Кэлин мурал киэҥник сэҥээриллэр искусство көрүҥүнэн буолар. Бу көрүҥ кыыллаахтары эмиэ тумнубата. Кэрэхсэбиллээҕэ диэн, өскөтүн, атын улуустарга, куораттарга дьону-сэргэни, тыынар тыыннааҕы уруһуйдуур эбит буоллахтарына, тустаах нэһилиэк мурала уратылаах – харысхал бэлиэтэ.
Идиэйэни нэһилиэк баһылыга Раиса Лавернова көтөхпүт. Идиэйэ, биир дойдулаахтара, нэһилиэк бочуоттаах олохтооҕо, Дьокуускайдааҕы ойуулуур-дьүһүннүүр искусство кэллиэһин преподавателэ, СӨ култууратын туйгуна Надежда Корнилова быһаччы ылсыытынан олоххо киирбит.
“Надежда Егоровна кэллэҕин ахсын, төрөөбүт дойдутун дьонун-сэргэтин сэргэхситэр тэрээһиннэри тэрийэн, эбэтэр көхтөөхтүк кыттан үөрэ-көтө үлэлэһэр. Бу да сырыыга сонун бэлэҕи уунна. Дойдуга бэриниилээх буолуу сылын чэрчитинэн уонна Сахабыт сиригэр уһуйаан тэриллибитэ 100 сылыгар анаан, нэһилиэкпит уруһуйдьут дьоҕурдаах дьонун Лидия Анатольевна Худаеваны, Ольга Викторовна Баишеваны, Зоя Садотовна Малгарованы, быйыл оскуоланы бүтэрбит Владислав Худаевы ыҥыртаан, ыҥырыылаах дьон үөрүүнэн сөбүлэһэн, биһиги уһуйааммыт сирэй өттүн олус дьэрэкээн харысхалларынан киэргэттилэр. Бу тэрилтэ салайааччыта Инна Семеновна Корнилова аахсыйа тэриллэн эрэрин өйөөн, олус түргэнник мурал оҥоһулларыгар матырыйаалын тута булан, үлэ тэтимнээхтик барда”, — диэн Кыыллаах нэһилиэгин баһылыга Раиса Лавернова кэпсиир.
Этиллибитин курдук, Надежда Егоровна дойдутугар бу хаһыс даҕаны тэрээһинэ. Ол курдук, бу иннинээҕи сылларга, туос оҥоһуктары тигиигэ, пленэргэ маастар-кылаастары, Олоҥхо ыһыаҕар бэлэмнэнии иитинэн араас сэминээрдэри ыыппыта. Манна даҕатан эттэххэ, Надежда Корнилова туостан оҥоһугу тигиигэ Арассыыйаҕа соҕотох преподаватель буолар.
— Хас сылын аайы ыытыллар сайыҥҥы сынньалаҥ-айар лабораториябын ыыттым. Тэрээһин быйыл үһүс төгүлүн буолла. “Бары — уруһуйдуубут” диэн бырагыраама иитинэн Дьокуускайдааҕы ойуулуур-дьүһүннүүр искусство кэллиэһин эбии үөрэхтээһинин бырайыага буолар.
Биир дойдулаахтарбар үчүгэйи, кэрэни бэлэхтиир санааттан араас айар бырайыактары толкуйдаан ыыта сатыыбын. Сайын аайы дойдубар кэлэн, дьоммор-сэргэбэр, эдэр көлүөнэҕэ билиибин тарҕатыахпын, үтүө санааны хаалларыахпын баҕарабын.
Дойдум дьоно, нэһилиэкпит баһылыга маннык тэрээһини ыытыаҕыҥ диэн этии көтөхпүттэригэр туора турбакка, үөрэ-көтө ылынным. Нэһилиэгим уруһуйдьут дьонун мунньан сүбэлэһэн баран “Эрэл” аахсыйа диэн ааттаан, бырайыакпытын саҕалаатыбыт. Биэс күнүнэн бүтэрдибит. Матырыйаалын барытын уһуйаан сэбиэдиссэйэ уйунан, атыылаһан, үлэ түргэтииригэр көмөлөстө. Кэнчээри ыччаппытыгар эрэлбит хаһан даҕаны сүппэтин, – диэн Надежда Корнилова санаатын үллэстэр.
Онон үөрэх дьылын көрсө кырачааннарга сонун бэлэҕи оҥордулар. Нэһилиэк олохтоохторо кэрэ харысхал айыллан тахсарыгар кыттыбыт, көмөлөспүт дьонноругар-сэргэлэригэр махталлара муҥура суох. Аны аҕыйах хонугунан кэрэ көстүүнү иитиллээччилэр сыаналыахтара.
Людмила ПОПОВА, “Саха сирэ” хаһыат, edersaas.ru