Өлүөнэ муостатын тутуу ханна тиийдэ?

Ааптар: 
Бөлөххө киир:

Балаҕан ыйын 21 күнүгэр Ил Дархан Айсен Николаев Өлүөнэ өрүһү туоруур муоста тутуутун боппуруостарын тула мунньаҕы ыытта.

edersaas.ru

Сүрүн боппуруос бэдэрээлинэй үбүлээһиҥҥэ сытар дуо?

«Үгүс дьон саныырынан, муоста тутуутун харгыстыыр сүрүн боппуруос бэдэрээлинэй үбүлээһиҥҥэ сытар. Ол эрээри, билиҥҥи туругунан, бырайыак олоххо киирэрин туорайдыыр элбэх боппуруос бырабыыталыстыба, куорат уокуругун салалтатыгар уонна Мэҥэ Хаҥалас көрүүтүгэр баар. Кэккэ министиэристибэлэр, биэдэмистибэлэр билиҥҥэттэн үлэни ыыталлара ирдэнэр”, — диэн Ил Дархан мунньаҕы саҕалаата.

Муоста тутуутун бырайыактааһын хаамыытын СӨ Тырааныспарга миниистирэ Владимир Сивцев иһитиннэрдэ. «НТК» ХЭТ дириэктэрэ Павел Овчинников бырайыактыыр-симиэтэлиир докумуон оҥоһуллуутун кэпсээтэ. Экэниэмикэ миниистирэ Майя Данилова концессионнай сөбүлэҥ боппуруостарыгар тохтоото.

Бырайыактыыр-симиэтэлиир докумуоннаһыы икки түһүмэхтэн турар. Бастатан туран, тутуу ыытыллар сирин-уотун бэлэмнээһин балаҕан ыйын бүтүүтэ түмүктэнэр. Ахсынньыга «Главгосэкспертиза» көрүүтүгэр киирэр. Салгыы 2020 cыл ахсынньытыгар муоста тутуутун докумуонун бастакы түһүмэҕин эспэртиисэтэ кэлэр. Туох баар геодезическэй гидрометеорологическай, экология, тырааныспар ирдэбиллэрэ, чинчийиилэрэ ыытыллыбыттар. Билиҥҥи туругунан, тутуу ыытыллар сирин-уотун былааннааһын, сири атыылаһыы, түүлэһии, сорох сирдэри «Куорат ойуура» диэн статустан таһаарыы, Эргэ Табаҕа тулатынааҕы бөҕү-саҕы ыраастааһын үлэтэ бара турар.

«Өлүөнэ эбэни туоруур муоста тутуутун бырайыага олоххо киирэр кэрдииһигэр тиийдэ. Туох баар мөккүөр барыта ырытыыны ааста. Бэдэрээлинэй бүддьүөттэн үбүлээһин боппуруостарын дойду салалтатын, бырабыыталыстыбаны уонна чааһынай партнердарбытын кытта тэҥҥэ быһаарыахпыт диэн эрэнэбин. Бырайыак олоххо киирэригэр инфраструктура сайдыытыгар бастыҥ көрдөрүүлээх ыаллыы эрэгийиэннэр – Новосибирскай уобалас, Ямало-Ненецкэй автономнай уокурук уопуттарыгар олоҕурар тоҕоостоох», — диэн Айсен Николаев тоһоҕолоон эттэ.

Айсен Николаев Бас билии уонна сир сыһыаннаһыыларын министиэристибэтигэр уонна муниципальнай тэриллиилэргэ сир учаастагын бэлэмнээһин үлэтин түргэтэтэргэ соруйда. Маны сэргэ Ил Дархан бу үлэҕэ-хамнаска научнай тэрилтэлэри кыттыһыннарар наадатын ыйда, итиэннэ тустаах министиэристибэлэргэ уонна биэдэмистибэлэргэ докумуону оҥоруу үлэтин тэтимирдэр наадатын эттэ.

Ирина Ханды, «Саха сирэ» хаһыат, edersaas.ru

Хаартыска — СИА.

+1
0
+1
0
+1
0
+1
0
+1
0
+1
0
+1
0