Олунньу 13 күнүгэр, Москва куоракка, Саха сирин бырабыыталыстыбата Өлүөнэ өрүһү туоруур муостаны тутууга концессионнай сөбүлэһиигэ “Ростех” госкорпорацияны уонна “ВИС” бөлөҕү кытта илии баттаста.
Санатан суруйдахха, 2019 сыл сэтинньи 9 күнүгэр СӨ Ил Дархана Айсен Николаев Өлүөнэ өрүһү туоруур муостаны тутууну Арассыыйа бүддьүөтүгэр киллэрэр туһунан көрдөһүү суругар дойду бэрэсидьиэнэ Владимир Путин «Олоххо киирэрэ уолдьаста» диэн резолюциялаан илии баттаабыта. Салгыы Арассыыйа бырабыыталыстыбатыгар бу боппуруоһу быһаарарга, этии киллэрэргэ соруйбута.
Өссө ааспыт сыл бэс ыйыгар буолбут “Быһа линияҕа” Владимир Путин «Өлүөнэ өрүһү туоруур муоста туһунан ыйытыыга, үөрэтэн баран, быһаарыахха наада» диэн эппиэттээбитэ. Онтон атырдьах ыйыгар СӨ Ил Дархана Айсен Николаев муоста тутуута Уһук Илин сайдыытын национальнай бырагырааматыгар киирбитин, балаҕан ыйыгар Арассыыйа сүрүн биэдэмистибэлэр сөбүлэҥнэрин биэрбиттэрин туһунан биллэрбитэ.
Өлүөнэ өрүһү туоруур муостаны тутууга концессионнай сөбүлэһии туһунан Уус Алдан улууһун баһылыга Алексей Федотов маннык этэр:
—Дьон күүтэр боппуруоһа быһаарыллан эрэриттэн үөрэбит. Сайын, күһүн илин эҥээр улуустарыгар сырыы уустугурар. Муоста тутуллан, кэлии-барыы эрэ быһаарыллыбат, ордук биир тыын боппуруоспут — оттугу, чоҕу тиэйии уонна ас-үөл, тутуу матырыйаалын кэлиитэ судургутуйуо диэн эрэнэбит. Үтүөнү, сайдыыны эрэ аҕалар муоста тутуллаары турар.
Ньургуйаана Иванова, «Саха сирэ» хаһыат, edersaas.ru
Хаартыска — интэриниэттэн.