Муома улууһун тыа хаһаайыстыбатын управлениетын салайааччытын э.т. Александр Софронов билиһиннэрэринэн, 1,5 тыһ. т оту соҕотуопкалыыр былаантан чиэппэрэ эрэ хомуллубут.
edersaas.ru
Үлэни быыстала суох ардахтар түспүттэрэ атахтаабыт, оттон сайын саҕаланыытыгар ыйы быһа курааннаабыта эмиэ охсууну оҥорбут. Онон, былаан туолара күчүмэҕэйдэрдээх буолбут. Нэһилиэктэринэн ыллахха, балаһыанньа Төбүлэххэ ордук уустук. Бу нэһилиэккэ 80 ынах сүөһү, 239 сылгы баар. Дьон ардах быыһыгар оттуу сатыыллар да, улахан өнүйүү суох. Арыый үчүгэй соҕус көрдөрүүлээх Чыбааҕылаах нэһилиэгин олохтоохторо былааннарын 79 бырыһыан толорбуттар. А.П.Корякин алта туоннаны чөкөтөн, сылгытын кыстатар отун хааччыммыт, И.Е.Корякин 20 туоннаны кэбиспит.
— Былыр оннооҕор буолуох ыарахан дьылга өбүгэлэрбит айылҕа эрииригэр-мускууругар бэриммэккэ сүөһү-сылгы бөҕөнү ииппиттэрэ, онон санааны күүһүрдэн ыкса күһүҥҥэ диэри оттуохпут, — диир Александр Софронов. — Нэһилиэктэр баһылыктара олохтоохторго хотуурдарын эрдэ ыйаабаттарын туһугар өйдөтүүлээх үлэни ыыталлара наада.
Мөлтөх субуокканы үчүгэйгэ иэҕээри салайааччыттан тыа хаһаайыстыбатын федеральнай бырагырааматын гранын ылар иһин дьүккүһэ сылдьар сылгы хаһаайыстыбалаах Петр Слепцову уонна сүөһү ииттэр Анна Ильинаны ыйыттым. Дьон бэртэрэ, үөрүөх иһин, маҥнайгы-иккис түһүмэхтэрин этэҥҥэ ааспыттар, аны үһүстэрэ атырдьах ыйын 20-гэр буолуохтаах.
Онон, төһө даҕаны кыраапыктан хаалларбыт, хотугу дойду сүрэх-бэлэс дьоно кыстыгы илии тутуурдаах, өттүк харалаах көрсөллөрүгэр мэҥ да саҕа саарбахтааһын суох.