Муома улууһун Төбүлэх национальнай нэһилиэгин дьаһалтата 52 ыалга буруо-баһаар автономнай биллэрээччитин (АДПИ) киллэрдэ.
edersaas.ru
Бу аахсыйаҕа кыттааччы АДПИ-ны ылан бэйэтин чугас дьонун, доҕотторун, элбэх оҕолоох ыал, социальнай өттүнэн көмүскэлэ суох ыал дьиэлэригэр туруорар. Биллэрин курдук, маннык датчиктар элбэх баһаары бохсорго көмөлөһөллөр уонна дьон олоҕун быыһыыллар.
Төбүлэх нэһилиэгин баһылыга Гаврил Соркомов баһаар дружинатын бэрэссэдээтэлэ Дьулустан Кудрины кытары АДПИ хайдах үлэлиирин нэһилиэнньэҕэ быһаардылар. Бу тэрил баһаар буолуон иннинэ буруо дьайыытын билэр уона улаханнык тыас таһааран биллэрэр. Онон, баһаар сибикитин эрдэ биллэрэр уонна баһаар турар кутталлаах дьиэтиттэн эрдэ куотар кыаҕы биэрэр.
АДПИ-ны кыбартыыраларга уонна уопсай дьиэлэргэ биирдиини ууруллар. «Биллэрээччилэр» бэйэлэригэр эмиэ болҕомтону эрэйэллэр. Ол эбэтэр, сылга кырата биирдэ батарейкаларын уларытыахха наада. Ону таһынан сыл аҥаарыгар саатар биирдэ оптика-электроннай датчиктаах камератын устан, пылесоһунан ыраастыахха наада.
Муомалар холобурдарын батыһан, олорор дьиэлэргэ, уопсай дьиэлэргэ уо.д.а. АДПИ-ны туруордахха, дьиэни уокка былдьатыы аҕыйыа турдаҕа.
Надежда ЕГОРОВА, «Саха сирэ», edersaas.ru