Пандемия саҕаланыаҕыттан ханна да урбаанньыттар, нэһилиэк олохтоохторо, кырдьаҕастар, эдэр ыччат дойдуларын балыыһаларыгар, кыһалҕалаахтарга ис сүрэхтэриттэн көмөлөһөллөр.
Быйыл саас хоруона хамсыга туруоҕуттан, Муома урбаанньыттара мэдиссиинэ үлэһиттэрин кытары ыкса сибээһи олохтообуттар. «Сомоҕолостохпутуна эрэ ыараханы этэҥҥэ туоруохпут» диэбиттэр.
Улуустааҕы киин балыыһа терапияҕа отделениета коронавирус дьаҥа туруоҕуттан, провизорнай, изолятор уонна инфекционнай отделение буолбута. Манна мэдиссиинэ үлэһиттэрэ дьаҥнаабыт дьону үтүөрдэр туһугар, туох баар кыһамньыларын ууран, өрүүрү умнан үлэлииллэр диэн улуус дьаһалтатын саайтыгар «Мин биисинэһим» улуустааҕы салааны салайар Наталья Добрянцева суруйар. Урбаанньыттар сууйарарга-тарыырга туттуллар сириэстибэлэри, хаһаайыстыбаннай уо.д.а. араас наадалаах малы-салы ылан биэрбиттэр. Маны таһынан, изоляторга туруорарга элбэх хайысхаҕа туһаныллар орону ыларга көмөлөспүттэр. Хонуу сэлиэнньэтин урбаанньыттара балыыһаҕа антисептиктары уонна сууйар-тарыыр сириэстибэлэри биэрбиттэр.
Улуустааҕы киин балыыһа кылаабынай бырааһа Наталья Павлова бары көмөлөспүт, өйөбүл буолбут урбаанньыттарга махтаммыт. «Дьоммут-сэргэбит, урбаанньыттар өйөбүллэрэ хаһааҥҥытааҕар да наада буолан турар кэмэ. Кинилэр көмөлөрө хоруона хамсыгын утары охсуһарбытыгар күүһү-уоҕу биэрэр, эрэли улаатыннарар» диэбит.